top of page

SA MNWD: P35 dagdag na tarifa sa tubig

An dugang na tarifa sa tubig sa Metropolitan Naga Water District (MNWD) iyo an solusyon nganing makabawi sa natatada pang milyones pesos na pagkakalugi asin gagamiton an fondo para sa konstruksyon kan dugang na walong pumping stations.


Alagad antes iimplementar maagi sa public hearing na papangenotan kan Local Water Utilities Administration (LWUA) na pigtalaan gibohon sa Ciudad nin Naga sa Enero 13, 2023.


Sa entrevista kan Bicol Mail ki Acting General Manager Florencio T. Mongoso Jr. an propuestong dugang na tarifa enot nang inaprubaran kan junta directiva kan 2019 asin yaon na sa lamesa kan LWUA nganing iyo an magdesisyon.


Sa propuesto dapat Php160.00 hali sa dating minimum na Php125 o may dugang na Php35.00.


Sa pag-aadal kan manijamiento kulang nin walong mga pumping stations nin huli ta inabot na nin walong taon na peryodo mayong pig-implementar na konstruksyon na pumping station. Dapat sa cada taon igwang sarong bagong pumping station na dai nangyari sa laog nin walong taon sagcod na inabot na nin mga problema kan nakaaging administrasyon. Makakatabang ini sa pagpakusog kan bulos nin tubig sa mga residencia maging sa commercial consumers.


Sa plano segun sa AGM ngunian na 2023 gigibohon si apat mantang si dugang na apat sa sunod na taon 2024. An cada ipapakonstruhir na pumping station nagcacantidad nin Php15-M hasta sa Php20-M.


Nagpaparadakul an consumedores asin establisimiento de negosyo dapat amay pa magpagibo na nin dugang na mga pumping station, sabi pa.


Kan mag-asumir sa opisina si Mongoso kan Hulyo 2022 nag-aatubang sa problema finansyal na milyones pesos na si kalugihan alagad sa anom na bulan niya bilang acting GM luway-luway nakakabangon alagad nagtapos si Deciembre 2022 igwa pang natatadang kalugihan.


Base sa huring computation igwa pang natatadang kalugihan nin maabot sa Php11 milyones, nabawasan na nin Ph4-M alagad igwa lugi pa nin Php7.4-M, sabi pa ni Mongoso.


Sa administrasyon kan dating general manager an empleados kan water district labi na sa 600 mas dakula kumpara sa Casureco II na igwa sanang nasa 300 apesar na sakop an sampolong banwaan asin sarong ciudad.


Nasiripan kan AGM na dakul na mga job orders maging casuals na may duplikasyon an saindang trabajo na dapat bawasan.


Huli kaini, an saiyang desisyon bawasan nin maabot na sa 98 JOs asin posibleng madagdagan.


Nakatabang sa dakulang pagkalugi sagcod nag-implementar nin higot paha sa iba pang operation expenses. An resulta luway-luway nababawasan si milyones pesos na pagkalugi. (DPAureus)

Pumping Station kan MNWD sa barangay Carolina, Ciudad nin Naga regular an ginigibong maintenance nganing maseguro perming makusog an bulos kan tubig. (MNWD)

Commentaires


bottom of page