SA MNWD: Petisyon sa dugang na tarifa satubig aaprubaran na kan LWUA

Piglalaoman kan Metropolitan Naga Water District (MNWD) kan Ciudad nin Naga na sa laog kan bulan nin Hunyo ngunian na taon puede na sindang magpatong nin singil sa tarifa sa tubig.

Ini kasunod kan kumfirmasyon ni Acting General Manager Florencio Mongoso Jr. na nakatalaan nang aprubaran kan Board of Trustees kan Local Water Utilities Administration (LWUA) an petisyon kan MNWD para sa dugang na P35.00.

Sa presente an minimm na tarifa sa tubig kan MNWD nagcacantidad nin P125.00 asin kun maaprubaran an P35.00 masakat na sa P160.00 na lomang tarifa kan taon pang 2009 mantang tugot sa LWUA na cada tolong taong puedeng magpalangkaw tarifa.

Dawa mag-implementar sinda nin dagdag na tarifa an MNWD iyo man giraray an may pinakahababang singil sa tubig sa nasyon, segun pa ki Mongoso.

Sinabi ni Mongoso na sindang mga general manager kan water district hale sa Bicol nagkaigwa nang miting ki LWUA Acting Administrator Vicente Homer Revil na saro sa natukar iyo an haloy nang pendienteng petisyon sa water rate increase.

Nagcierto an Acting Administrator na maaprubaran lang sa board meeting kan BOT an petisyon sa water rate saiya nang pipirmahan mantang napapanahon na an dugang na tarifa.

Kan nakaaging manijamiento lakma sa finansyal an water district sagcod na tinanggal sa puesto an dating GM Engr. Virgilio Launsing. Alagad sa bagong manijamiento ni Mongoso nakabangon sa kalugihan huli kan saiyang mga ginibong pagtipid sa paggamit kan fondo sagcod na maghaklas kan mga dai na kaipuhan na job order na empleados.