SA MNWD: Suplay nin tubig apektado huli kan super El Niño
Dawa nagdugang pa nin mga pumping station an Metropolitan Naga Water District (MNWD) alagad an manihamiento nagpatanid na dapat magtipid sa paggamit nin tubig huli kan epekto kan ‘‘super El Niño’’.
Laen pa kaini an paghuros kan tubig hale Mt. Isarog Spring nin nasa 35 por ciento saro pa sa epekto sa pagkulang-kulang suplay nin tubig.
Si General Manager Florencio Mongoso Jr. nagpatanid na kaini sa publico huli kan pigsasabi kan PAGASA na super El Niño na piglalaoman aaboton pa sa premirong cuarto sa sunod na taon.
Sa ngunian an water district, segun ki Mongoso mantinido pa an regular na suplay nin tubig sa Ciudad nin Naga.
Kun dai igua sanang tolong mga pumping station alagad sa bagong liderato ni Mongoso igua nang sampolo mantang padagos na nagdadakul ang mga edificio asin tawo sa ciudad. Nagpapadagos pa an construksyon kan ibang mga pumping station sa ciudad nganing maseguro an suplay nin tubig. Makakatabang an saindang pag-utang nin P135 milyones nganing dai maabala an construksyon kan dugang na pumping station.
Padagos an saindang regular na pag-monitor kan mga pumping station nganing macierto an suplay nin tubig sa ciudad.
Sa ibang mga water district sa Camarines Sur apektado na an saindang suplay huli kan El Niño.
Comments