SA MODERNISASYON KAN PNR: Sagcod palang sa survey

Patapuson na termino ni Presidente Rodrigo Duterte alagad natatapos pa sana kan 2019 an satellite survey kan China Railway Engineering (CRE) nganing buhayon giraray an Philippine National Railways Bicol Express para sa konstruksyon kan bagong relis haling Manila hasta Bicol.

Alagad mayo pang pinal kun nuarin masikad an proyecto mientras na pighahaman pa an plano asin documentations asin ciertong madadagos na an Php175-B na inutang kan gobierno para sa modernisasyon kan Bicol Express.

An CRE kaibanan an Engineering Department kan PNR Bicol sa pamamayo ni Greg Mano nagconducir kan saindang satellite survey sa mga PNR railways sa Camarines Sur, Albay sagcod na nagbisita sa Sorsogon mantang kabale na sa bagong ruta sa viaje kan Bicol Express iyo an Matnog, Sorsogon.

Sinabi ni Mano na dakul na mga banwaan an kabale sa program re-routing mientras kaipuhan sa bagong desinyo sa makaskasan na dalagan kan train na aabuton nin sagcod sa anom na oras an viaje haling Manila sundo sa Matnog, Sorsogon.

Sa saindang survey sampolong kurbada sa Sipocot-Lupi section an kabale sa dapat dai na agihan kan bagong railway maging sa iba pang mga lugar kun igwang halabang mga kurbada dai na aagihan kan rehabilitasyon mantang an dalagan an ginibong desinyo para 120 kph asin operational speed na 80 kph.

An grand terminal ibubugtak sa 14 hektaryang lote sa Pili, Camarines Sur harani sa Provincial Capitol asin kabale sa napiling lugar na grand terminal sa Daraga kan provincia nin Albay.

Enot nang sinabi ni Secretary Arthur Tugade an time-table puon 2018-2022 alagad dai nangyari. An konstruksyon kan bagong railway system sa paagi kan Chinese general consultancy service.

An train stations hale sa Paco, Manila abut sa Matnog, Sorsogon na mapalaba asin lakbang kan 683 km na bagong konstruksyon kan railways kaparejo sa international standard.

Siyam an mga train stations na ikokonstruhir sa Paco, FTI, Los Baños, Lucena, Gumaca, Pili/Naga, Legazpi/Camalig, Sorsogon City asin Matnog.

Sa report kan DOTr, ipinahayag na maabot sa 100,000 na mga familia an apektado sa reconstruction kan PNR railways kan Bicol Express.

An fondo na nagcacantidad Php175-B sa dakulang proyecto kan perokaril inutang kan gobierno kan Filipinas sa China na dapat mabayadan sa laog nin viente (20) anyos asin dos por cientong interest per anum. (DPAureus)