SA MUCEROS RAPE SLAY CASE: P100K itataong premyo sa makakatukdo sa suspek

Nag-aandam na nin fondo an City Hall na nagcacantidad nin P100,000 bilang ‘‘reward money’’ sa siisay man na makakatukdo sa suspek na naglupig asin naggadan sa 18 anyos na daragitang estudiante sa high school sa Barangay Panicuason, Ciudad nin Naga.

Ini an mga pahayag ni Alcalde Leni Robredo kan mag-atubang sa miembros kan media kasunod kan saiyang pakikipag-ulay sa opisyales kan NCPO kan barangay asin opisyales de barangay.

Sa saiyang miting sa miembros kan NCPO sa sinambit na barangay, inako na igua na sindang suspek sa biktimang si Rosalie Museros alagad an problema may ‘‘butal pa’’.

Nganing makatabang sa pagtukdo sa suspek na madakop na kan mga awtoridad, an jefe ejecutivo nagsabi na an saiyang pagpaluwas nin ‘‘reward money’’ nganing maitukdo na an responsable sa makangirat na krimen.

Langkad na si Robredo huli ta sagcod sa ngunian dai pa natatawan justicia an krimen. Enot nang sinabi kan NCPO na igua na sindang apat na ‘‘persons of interest '' alagad masarong bulan na sa Deciembre 27, 2025 dai pa maaraman an responsableng suspek. An biktima nakua sa maduot na lugar sa Zona 6.

An familia nagsabi na an paaram kan biktima kan Noviembre 26 nin banggui mapasiring sa mga ka-klase nganing mag-research alagad mayo na nin buhay kan makua kinaagahan.

An mga awtoridad padagos na naghahagad nin cooperasyon sa residentes kan barangay nganing maresolveran na tolos an caso.