SA NAG-EEDAD NIN 0 HASTA 59 BULAN: Pagbabakuna ilalansar kan DOH sa Mayo 2023

An Department of Health Bicol Center for Health Development (DOH Bicol CHD) padagos an mga ginigibong symposium sa mga jefe ejecutivo lokal nganing andaman an pagbabakuna sa mga nag-eedad nin 0 hasta 59 bulan sa masunod na bulan nin Mayo 2023.

An koordinasyon pinonan na sa Catanduanes, Camarines Sur asin Ciudad nin Naga mientras isusunod an iba pang mga provincia kan Bicol pakatapos kan semana santa.

Sinabi ni Regional Director Ernie Vera kan DOH Bicol kabali sa dapat itudok na bakuna sa mga aki iyo an Measles-Rubella asin Oral Polio Vaccine, Supplemental Immunization Activity (MR OPV SIA) mantang kasabay na digdi iyo an ilalansar na Philippine Multi-sectoral Nutrition Project (PMNP).

An mga jefe ejecutivo asin stakeholders nagcierto na nin suporta sa actividad kan ahencia na pigtalaan sa bilog na bulan kan Mayo 2023.

Nagpahayag pa si Vera na an pagbabakuna sa mga kaakian importanteng marhay para sa proteksyon kan saindang salud alagad dapat magkooperar an mga magurang para sa salud asin buhay kan saindang aki.

Target kan ahencia na mabakunahan iyo an labi sa on milyon na kaakian sa anom na provincia kan rehiyon cinco.

Sa pigtalaan na ilalansar na PMNP an proyecto katuwang an Department of Social Welfare and Development (DSWD) asin an National Nutrition Council (NNC) Regional Office V. An proyecto dakulang tabang sa mga LGUs nganing iimplementar an nutrition program sa mga kaakian na dapat yaon an interbensyon kan ahencia asin an benipisyaryo digdi si nag-eedad nin dai ma-cinco anyos, yaon an para sa women of reproductive age na igwang mga aki na yaon pa sana sa 1,000 diyas.

Magiging katuwang sa actividad kan DOH iyo an mga Municipal Health Unit asin Barangay Health Workers.