top of page

SA NAGA CITY PEOPLE’S MALL: P30-M fondo para sa wastewater treatment facility

Nagtagama nin treinta milyon pesos na alokasyon sa 2024 annual budget an lokal na gobierno kan Ciudad nin Naga tanganing mabugtakan na nin wastewater treatment facility an Naga City People’s Mall (NCPM).


Ini an kumfirmasyon sa Bicol Mail ni Engr. Joel Martin, jefe kan Solid Waste Management Office (SWMO) kan ciudad alagad dai pa maaraman kun nuarin isusunod an bagong edificio kan Naga City General Hospital sa Barangay Balatas.


Mandato kan Department of Environment and Natural Resources (DENR) an pagbugtak kan facilidad huli ta an mercado nagbubulos nin maating tubig sa Naga River.


An lomang City Hospital sa Peñafrancia Avenue mayong wastewater treatment facility.


Sinabi pa ni Engr. Martin antes magbugtak kan facilidad sa mercado publico kaipuhan maghagad ngona nin permit sa DENR, siring kan ginibo sa Sanitary Landfill sa Barangay San Isidro na abala an proceso huli kan halabang rekisitos.


Mientras tanto, an pighahagad kan SWMO na dagdagan nin fondo sa 2024 annual budget an saindang opisina nganing makabakal nin dugang na mga garbage truck dai marerealisar huli ta cuatro milyon pesos sana an pigtagana para sa sarong truck.


Sa ngunian an SWMO igwa sanang sampolong ginagamit na garbage truck na panhakot kan labi sa 200 toneladang basura aroaldaw na dapat igwang 16 na truck nganing maubos an pigkokolectang basura aroaldaw alagad saro pa sana an pigtagamahan fondo ngunian na taon mantang igwang ibang mga prayoridad na mga proyecto an ciudad. (dpa)



コメント


bottom of page