SA NFA ALBAY, CAMARINES NORTE: Presyo kan tinutongod naparoy sa paraoma dinogangan

Duwa nang sanga kan National Food Authority (NFA) sa Bicol an nagdogang kan saindang palay buying price kan mga paraoma sa cantidad nang P26.00 cada kilo huli sa P3.00 na insentibo hali sa duwang gobierno provincial.

An Capitolio Provincial kan Albay asin Camarines Norte parejong nagtataong insentibo nin P3.00 cada kilo sa presenting P23.00 na palay buying price kan NFA na igwa nang total na P26.00 cada kilo.

Ini an mga pahayag ni Jaharah Revilla-Pavilando, regional information officer kan NFA Bicol alagad igwa man suhay na LGUs na kinababalihan kan Barcelona nagtataong P1.00 na insentibo asin Pilar P3.00 parejo kan provincia nin Sorsogon.

An LGU Camarines Norte kan 2023 nag-iimplementar na kan insentibo mantang an LGU Albay nagpoon na ngunian na taon 2024.

An mga calificadong paraoma sa programa dapat rehistrado sa Registry System for Basic Sectors in Agriculture (RSBA) kan Department of Agriculture.

Sa datus kan DA Bicol igwang total na 122,569 na paraoma na rehistrado sa RSBA, Albay igwang 76,756 asin Camarines Norte 45,813. Alagad nagdedepende sa paraoma kun an saindang paroy dadarahon sa pribadong kumprada o NFA.

An NFA Bicol padagos na nag-eenganyar sa mga paraoma sa Albay asin Camarines Norte na ipatungod sa saindang opisina an mga inaning paroy matapos maglangkaw naman an presyo kan palay buying price na P26.00 hali sa dating P19.00 asin P23.00.

An subsidiya makakatabang sa dakulang gastos kan paraoma siring kan mahal na presyo kan abundo, banhi, pesticides asin gastos sa mga trabajador.

Naglalangkaw na an palay procurement huli sa insentibo kan LGUs madakol pa an butter stock sa mga bodega kan ahencia na magagamit kan mga lokal na gobierno oras na may calamidad, sabi pa kan NFA. (DPAureus)