SA OKTUBRE 25, 2025: Grupo civico sa CamSur malansar rally vs kurapsyon

Pig-aandaman na kan grupo civico sa Camarines Sur an saindang gigibohon na protest rally sa Ciudad nin Naga sa Oktubre 25, 2025 laban sa kurapsyon na paparticiparan kan manlaen-laen na sektor kan provincia.

Sinabi ni Bong Rodriguez kabale sa organizers kan protesta cierto nang dagos an saindang hiro protesta huli ta dapat bako lang helingon an nangyayari sa Bulacan asin iba pang lugar envez igua man siyang aram na anomaliya sa mga infrastructure project sa CamSur kabale na digdi an ghost project asin malasadong proyekto sa hospital asin dakul pang iba.

An grupo kinababalehan nin mga abogado, doctor, dating juez asin dakul pang iba nganing saindang idenuncia an kurapsyon sa gobierno asin dangogon an agrangay kan tawo asin magbutwa an dakulang isyu man digdi sa provincia, sabi pa ni Rodriguez.

Kaipuhan ta nang mamuklat huli ta nagtutubod siya na igua man ghost project digdi sa Camarines Sur nganing maaraman kan tawo.

Sa dakulang protest rally posibleng saindang ibiklad an mga evidencia sagcod na makaabot sa Independent Commission on Infrastructure (ICI) na pigcrear ni President Ferdinand Marcos Jr.

An sektor nin paraoma padagos kan saindang reclamo sa baratong presyo kan paroy alagad an mga politico asin iba pang ahencia de gobierno padagos sa paghabon kan cuarta ni Juan dela Cruz, sinda an nagpapayaman alagad an paraoma iyo an nagtitios.

Hagad ninda an tamang ayuda envez na paghabonon sana kan mga nasa gobierno.