SA OPLAN SEMANA SANTA KAN PNP: 3K na kapupulisan nakawarak sa Bicol

Tanganing macierto an matuninong na paz y orden sa Kabikolan sa paagi kan Oplan Semana Santa, an Philippine National Police (PNP) sa rehiyon nagwarak nin labi sa tres mil na kapupulisan sa anom na provincia.

Ribo-ribong turista, bakasyonista an nagpuruli nganing maheling an saindang familia asin bilang Catolico Romano kaipuhan ipadagos an saindang debosyon sa mga aldaw nin Semana Santa.

Sinabi ni P/BGeneral Andre Dizon, regional director kan PNP Bicol an regular na pagpatrolia kan saindang kapupulisan maninigo para sa proteksyon asin seguridad kan namamanuan.

Huli kaini, an lambang provincia iguang dugang na augmentation force na kinababalihan kan Camarines Sur – 617; Albay – 485; Ciudad nin Naga – 472; Camarines Norte – 250; Sorsogon – 216; Catanduanes – 452; asin Masbate – 262.

Kabale sa saindang madedestinohan iyo an simbahan, terminal, sa mga lugar kan Amang Hinulid na parating ribo-ribong debotos an nagsusungko, checkpoint, pagmantenir sa trafico asin iba pang matawong lugar, sabi pa ni Dizon.

Probado na kan PNP Bicol na kun yaon an dakul na mga police visibility nagkakaigua nin matuninong na paz y orden mantang dai makabuelo an mararaot na elementos.

Alagad hinahagad kan PNP an cooperasyon kan publico na kun mga nagpapasaway o naghahasok nin kariribokan dapat iosip tolos sa pinakaharaning jepatura nganing marespondihan.