SA P928B 2026 BUDGET KAN DEPED: Makakaresolber sa kakulangan mga classrooms, paratukdo

Dakulang tabang sa Department of Education (DepEd) an aprubadong P928.5 billion national budget kan ahencia para sa 2026 nganing magpatugdok nin dugang na mga classrooms asin pagkalap nin dugang na mga paratukdo.

Si Atty. Salvador Pelingon, opisyal na parataram kan DepEd Camarines Sur nagpahayag sa media na an dakulang fondo sa saindang ahencia dakulang bagay nganing makapatugdok nin dugang na mga classrooms, learning materials, dugang na paratukdo na kabale na digdi an promotion sa labi sa 6 mil na paratukdo asin iba pang importanteng kaipuhan kan saindang ahencia.

An Camarines Sur iyo an may pinadakulang populasyon nin estudiantes na parating nagkukulang-kulang nin school building asin piglalaoman na marerealisar na ngunian huli sa dakulang budget ngunian na taon.

Maging sa iba pang provincias kan Kabikolan saro man sa problema ni regional director Gilbert Sadsad iyo an pagkulang-kulang nin classrooms asin sa ngunian puedeng maresolberan na.

Si DepEd Secretary Sonny Angara nagsabi na premirong nangyari sa sainda an pinakadakulang fondo para sa 2026.

An national budget inaprubaran ni Presidente Ferdinand Marcos Jr. kan Lunes, Enero 5, 2026 asin an ika-duwang ahencia na may dakulang budget iyo an Public Works -P881.3B na nagsunod an Health – P320.5B.

Tatawan prayoridad kan DepEd an pagpatugdok nin 35,000 nin bagong mga classrooms kabale na an rehabilitasyon, suportaran an mga kaipuhan kan paratukdo, programa sa nutrition, pagkalap nin dugang na 65,000 na paratukdo asin digital connectivity para resolberan an krisis sa edukasyon.