Sa Pagbasa an Pag-asa

Segun ki Gabby Bordado kadto kan siya pa an Senior Consigliori sa Naga City Hall dakul nang taon an naka-agui, nasa pagbasa an pag-asa.

Si Cong. Bordado na midbid na parasurat nin libro, artikulo, column asin rawit dawit, debatista, orador asin iskolar poon sa Calabanga Pilot School, Ateneo de Naga High School, UP Los Baήos asin UP Diliman. Pigdadangog an saiyang mga hulit bako lang sa politika kundi sagkod sa media asin agrikultura.

Nadagdagan pa na pareho sindang mag-agom ni Dr. Gina Florida Bordado PhD. na sarong respetadong edukador parareho mga parabasa. Bako lang pati sa English kundi pati Filipino asin Bikolano.

May liderato na, marhay pang maki-iba. Chairman siya kan UP Sarong Banggi Organization kan panahon. Maski sa Sangguniang Panlungsod kan siya Konsehal asin Bise Alkalde an saiyang pusog na paninindugan ginagalang kan kadaklan ta perming batay sa katotohanan.

May lealtad pa sa politika.

Orog na kan siya yaon na sa Kongreso bilang Representante kan Naga asin kan tercer distrito kan Camarines Sur pigsasaluduhan siya asin pigtitingag kan saiyang constituents saka pag-iriba ta an saiyang mga diskurso asin komentaryo bunga nin hararom na pag-adal, paghorop-horop asin konsultasyon sa publico en heneral.

Kaya bilang politiko asin legislador maski ngani nasa ikatolong turno na siya kan saiyang pambihirang karera sa politika pero dai kita magngalas kun maglawig pa asin magtaas pa sa mas halangkaw na pwesto an saiyang servicio publiko.

Hali sa sarong pobre asin mataling pamilya sa Calabanga, an saiyang esposa hali man sa Pili, an capital town, pero sa mga eskwelahan na saindang inaguihan asin sa mga organisasyon na saindang binalihan minimirar an saindang servicio bilang ugay nin Diyos asin ugay nin marhay na servicio sa banwaan.

An kayamanan kan mag-agom na Bordado asin kan saiyang mga aki iyo an mga libro asin mga babasahon na nagtatao nin kadunungan bako lang sa sainda kundi pati sa saindang mga pag-iriba.

(An mga magurang ni Mrs. Bordado sa Pili anas naguin kaptan asin kapitana sa poblacion).

* * *

Kulibat ko palan an librong “Ini an Totoo” lakop na bako lang sa Bikol kundi pati sa luwas. Naoogma ako ta bako lang mga Bikolano an nagbabarasa kan librong Bikolnon kundi pati mga dayuhan.

Igwa na nagbarakal sa Vancouver, Canada sagkod sa mga provincias kan Alberta asin British Colombia nasa kamot na kan mga taga California asin New York, sa Australia, Hongkong, Singapore asin pati sa Europa.

Digdi sa Bikol haros gabos na libraries sa mga mayor na eskwelahan sa Naga, Iriga asin Camarines Sur igwa na nin kopya na pwede nang basahon kan mga paratukdo asin mga estudyantes.

Salamat sa mga university asin college presidents, principals nin mga high schools, superintendente kan DepEd asin mga dekano kan saindang pagsuporta kan librong “Ini an Totoo”.

Kaya inspirado akong magsurat nin panibagong libro ngonyan na taon kun tutugutan kan sakuyang publisher. “An Ini an Totoo” piglansar ni Arsobispo Rolly Tirona kan Caceres sa Borja Farm kan Magarao Farm kan sarong taon na Pebrero.

Sana magka-igwa nin pagbunsod nin bagong libro ngonyan na taon. An pangako ko sa saderi iyo na magpapadagos na magsurat asin magbasa sagkod na naghahangos pa.

Sana maglawig pa man an sakuyang buhay ta yaon dyan an sakuyang pag-asa.