SA PAGGILID KAN PUBLIC HEALTH EMERGENCY: Publico dapat maglikay giraray vs Covid 19-DOH

Dawa binaba na ni Presidente Ferdinand Marcos Jr. an state of public health emergency sa paagi kan Proclamation No. 297, an Department of Health Bicol Center for Health Development (DOH Bicol CHD) nagpahayag na dapat maglikay man giraray an publico sa caso kan Covid-19 para sa saindang proteksyon sa salud.

Haros zero na sa caso sa Covid-19 an ibang provincia alagad poon kan Agosto 7, 2023 an mga provincia sa Bicol afuera kan Camarines Norte zero sa caso; duwa sa Sorsogon; pitong caso sa Camarines Sur, duwa sa Catanduanes; Masbate asin Albay parejong zero. Alagad kaipuhan man giraray maglikay mantang sa ngunian an naglalangkaw iyo an helang na trangkaso.

Sinabi ni DOH Director Ernie Vera na pabor siya na maggamit man giraray nin face mask sa tahaw kan mga report na igwa naman bagong klaseng virus kan Covid-19.

Dapat isuhay man giraray an positivo sa Covid-19 sa laog nin sampolong aldaw asin dai ibaliwala an may helang para sa proteksyon kan lambang familia.

Kadakli kan mga hospital sa Bicol dawa dai na naglalangkaw an deadly virus alagad perming preparado nganing makontrol tolos an helang.

An proclamation, na permado kan nakaaging Viernes, Hulyo 21, 2023 nagpapahayag na an gabos na enot na mga orders, memoranda, asin issuances na epektivo sana durante sa state public health emergency gabos cancelado.

Sinabi pa sa proklamasyon na an gabos na emergency use authorization na pig isyu kan FDA base sa Executive Order No. 121 magpapadagos na valido sa laog nin sarong taon poon na mag pagluwas na nagbabasura kan state of health emergency.

Dinagdag pa kan DOH Bicol mantang tig-uran naman an panahon nagkapera an caso sa dengue na saro sa dapat tawan nin prayoridad kan mga city asin municipal health offices katuwang sa advocacia an barangay na maglikay an residentes.

Pig-eenganyar kan ahencia an publico labanan an dengue sa paagi kan pig-iimplementar na 4-S strategy sa saindang harong asin kapalibutan kan natad sa paagi kan ‘‘Search and destroy mosquito-breeding sites, Self protection measures like wearing of long pants and long sleeved shirts and daily use of mosquito repellent, Seek early consultation, and Support fogging spraying only in hot hotspot areas where increase in cases is registered.’’