SA PAGHALI KAN SHS SA SUCs: Manga estudiantes sasaluhon kan DepEd

Iginilid kan Department of Education (DepEd) an paghadit kan mga estudiantes asin magurang sa pinaluwas na patanid sa mga Senior High School (SHS) na isisikwal na sinda kan mga State Universities and Colleges (SUCs) sa masunod na school year.

Si DepEd Regional Director Gilbert Sadsad nagpahayag kaini sa tahaw kan saindang amay na mga pag-andam sa posibleng maaapektaran na mga estudiantes mientras na bukas an mga public school nganing admitiron sinda sa masunod na school year.

An mga estudiantes na ma-enroll sa pribadong escuelahan pigtagamahan nin fondo kan gobierno sa paagi kan inaapod na vouchers na nagcacantidad nin Php22,500 sa highly urbanized areas mantang Php17,500 sa iba pang categoria.

An SUCs nagpaluwas na nin patanid sa publico na dai na sinda maako kan Senior High School epektibo sa masunod na school year.

An mga estudiantes nahadit kan anuncio alagad pigseguro kan DepEd na andam nindang saluhon an problema kan magurang maging estudiantes.

An anom na mga provincias sa Kabikolan igwang mga SUCs alagad an mga estudianes iwawarak kan DepEd sa mga public school.

Perming nagkukulang nin mga classrooms sa mga escuelas publica alagad dai man piglinaw na posibleng magsuroksokan naman an estudiantes.

An DepEd saro sa ahencia kan gobierno nasyonal na may dakulang budget sa 2024 asin kukuanon digdi an pagpa-construir nin dugang na mga classrooms asin dugang na paratukdo.