top of page

SA PALAY PROCUREMENT: Insentibo sa buying price kan NFA sa 5 provincia sa Bicol, hinahalat

Nagkakaigwa nang mga koordinasyon an opisina rehiyonal kan National Food Authority (NFA) sa Bicol sa lima pang mga gobierno provincial nganing maglaog sa memorandum of agreement na tagamahan nin fundo an ahencia para insentibo sa buying price sa paroy kan paraoma sa paagi kan palay procurement (PP) kan ahencia.


Ini an mga pahayag sa Bicol Mail ni Jaharah Pavilando, regional information officer kan NFA Bicol nganing sarama an buying price kan paroy sa Bicol sa lindong kan saindang PP bako lang an mga paraoma sa Camarines Norte na igwang P5.00 insentibo an LGU sa cada kilo kan paroy.


Afuera sa LGU Camarines Norte na nagpirma na sa MEMOAG an dai pa kabali iyo an Camarines Sur na tambobong nin paroy sa Bicol, Albay, Catanduanes, Masbate asin Sorsogon.


Nagsunod sa Camarines Norte iyo an LGUs kan Malinao, Albay; Barcelona, Sorsogon; asin Pilar, Sorsogon alagad dai parejo an saindang dugang na insentibo.


Pigbuyagyag kan NFA kan Enero 12, 2023 nagkasundo sa paagi kan MEMOAG an ahencia asin LGU Camarines Norte na magtaong P3.3 milyon na fundo an LGU para sa P5.00 na insentibo cada kilo kan paroy na benispisyado digdi an mga paraoma.


Naging epektibo ini kan P19.00 pa an bakal kan paroy sa paraoma na nadagdag nin P5.00 na igwa nang total na P24.00 cada kilo.


Sagcod sa ngunian padagos pang pig-iimplementar kan NFA Camarines Norte dawa naglangkaw na an bakal kan ahencia sa P23.00 cada kilo.


Sa ngunian sa bagong buying price na P23.00 kan NFA kun igwang insentibo nin P5.00 an LGU Camarines Norte nagbabakal an ahencia nin P28 cada kilo.


An sektor nin paraoma sa Camarines Norte nagpahayag nin pasasalamat sa saindang Gobernador Ricarte ‘‘Dong’’ Padilla nganing magdugang an presyo kan paroy.


Katuyohan kan NFA Council na langkawan an buying price kan NFA nganing digdi na magpabakal kan saindang paroy an mga paraoma asin maglangkaw an saindang stock sa mga bodega para sa food security.


An sinambit na sektor enot nang nagrereclamo kun kasuarin nag-epekto si Rice Tarrification Law bagsak si presyo kan paroy alagad sa NFA Camarines Norte sana nagpalangkaw presyo.


An Kilusang Magbubukid sa Bicol naghuhurot na langkawan an presyo kan paroy mantang panahon ngunian nin aranihan. (dpa)


Mga nakareserbang bagas sa bodega kan NFA anas lokal na produkto (DPA)



Comments


bottom of page