SA PAMBABADIL GADAN SA PB: P100K nakatayang premyo sa makakatukdo sa mga suspek

Nagtagama nin P100,000 an lokal na gobierno kan Pili, Camarines Sur nganing itaong premyo sa siisay man na makakatukdo sa pambabadil gadan ki Punong Barangay Nerio Brazal kan Barangay San Juan.

Si Alcalde Tomas Bongalonta nagsabi na nagkaigua ngona sinda nin miting sa finance department kan LGU sa kukuanan nin fondo na pig-uyonan man kan Municipal Police Station (MPS) an sinambit na reward money nganing makatabang sa awtoridad sa pagtukdo sa responsable sa krimen.

An pambabadil nangyari kan Hunyo 5, 2025, mga alas 5:10 nin aga sa Barangay San Juan. Sa imbestigasyon kan MPS Pili, CamSur, an duwang suspek naka-bonnets asin nakalunad sa motorsiklo, kan mag-abot sa meat shop kan biktima tolos pinagbabadil nin nagkaperang veces na tolos binawian nin buhay. Nagkutipas tolos an duwang suspek na padagos pang inaaram kan imbestigador kan MPS an motibo kan krimen.

Nagsususog na sa nagkaperang mga CCTV footage an mga awtoridad nganing maparikas an imbestigasyon.

Hinahagad kan MPS an cooperasyon kan mga nakaheling nganing makatabang sa pagtao nin justicia sa biktima.

An pag-iribang barangay kagawad kan biktima nagsabi na mayo sindang aram na may dakulang kaanggotan sa ama kan barangay.

Namumundo an jefe ejecutivo kan LGU sa insidente asin ini premirong punong barangay sa saindang banwaan na biktima nin pambabadil.

MANTANG sibot sa pagtao nin seguridad