SA PAMPLONA, CAMARINES SUR: Duwa nang lider kan actingmayor pinagbabadil, gadan

Magkasunodan na pinagbabadil gadan an duwang lider ni Acting Mayor Ronaldo ‘‘Boy’’ Franco sa laog sana nin duwang semana na sagcod sa ngunian nagpapadagos pa an imbestigasyon kan Municipal Police Station alagad pinagheheling an angulo saro sana an nasa likod kan krimen huli ta dai nagrarayo an senaryo sa kaparehong insidente.

Hinagad na ni Alcalde Franco an marikas na imbestigasyon kan caso nganing matawan justicia an sinambit na krimen alagad an jefe ejecutivo dai na nagtaong reaksyon pinaubaya na sa MPS an imbestigasyon.

Si P/Capt. Antonio Per, jefe de pulisya kan MPS sa Pamplona, Camarines Sur nagpahayag sa entrevista kan Bicol Mail sa paagi nin telepono na parejong calibre 45 an ginamit sa pinakahuring insidente ki Secretary to the Mayor, Salvador ‘‘Bong’’ Nasol, 60 anyos, may agom asin ki brgy. kagawad Rodel Nacion Dacian, 40 anyos, soltero kan barangay Tampadon asin siya saro sa pigtitiwalaan na lider sa barangay kan jefe ejecutivo.

Sinabi ni Per na sainda nang dinara sa PNR Crime Laboratory kan PPO Camarines Sur an mga nakuang bala kan calibre 45 sa magkasuhay na krimen nganing madeterminaran kun an badil iyo man sana an ginamit kan mga gunman sa magkasunodan na insidente.

Ipinahayag pa ni COP Per, si Nasol pinagbabadil gadan nin calibre 45 alas 9:30 nin banggui kan May 29 mientras na nakakakalaog palang sa saiyang residencia sa barangay Tambo hale sa quarantine facility sa brgy Kagbibi kan kaparejong banwaan.

Sa imbestigasyon an biktima mantang lunad sa van igwa nang nagsusunod na motorsiklo alagad kan magbaba asin naglaog sa harong igwa nag-apod asin pagtangka sa puertahan tolos pinaputokan nin nagkaperang veces na kabale sa kritikal na tama sa payo.

Ipinahayag pa na igwa nang dating look out antes mag-abot an biktima asin kan magdulag pinalunad na sa motorsiklo padulag sa direksyon kan Ciudad nin Naga.

Dinalagan tolos an biktima sa hospital sa Naga alagad pigdeclara nang Dead on Arrival.

Igwa nang nakua an MPS hale sa CCTV camera kan magdurolag an suspechado.

Hinagad man ni Per sa mga testigos na magcooperar nganing matawam justicia an pambabadil sa biktima.

Si kgd. Dacian, pinagbabadil gadan alas 9:30 nin aga kan Lunes, Mayo 17 mientras lunad sa motorcycle kaibanan an saindang ina na nag-puli sa saiyang residencia sa Brgy. Tampadon.

Sa imbestigasyon kan MPS matapos magpundo an biktima, tolong dai mabistong lalaki an biglang nagbutwa asin saro sa sainda armadong badil na iyo an nagbadil nin nagkaperang veces ki Dacian.

Nadara pa sa hospital alagad alas 4:00 nin hapon binawian nin buhay. (DPAureus)