SA PANGAGADAN KI PAY RUDEL: P2-M reward money ni LRay samakakadakop, tukdo sa suspek

Nakatipon nin cantidad dos milyones peso si Diputado LRay Villafuerte kan segundo distrito Camarines Sur nganing itao sa siisay man na makakatukdo, makakadakop para makasohan an mga suspechado asin nasa likod sa pambabadil gadan ki dating Consejal ‘‘Pay’’ Rudel Divinagracia kan Pili, Camarines Sur.

Ini an pigtayang cantidad kan diputado mantang sagcod sa ngunian dai pa makataong angulo an Pili Municipal Police Station kun ano an posibleng motivo sa pambabadil gadan sa dating consejal kan LGU Pili.

An mga pahayag na ini ni Villafuerte sa entrevista sa saiya ni Benjie Rivera kan BBS FM Radio sa Barangay Balatas, Ciudad nin Naga. Sinabi pa kan diputado si Divinagracia sarong simpleng tawo, maboot asin matinabang.

An biktima, binadil gadan kan duwang suspechado lunad sa motorsiklo bandang alas 9:00 nin banggui kan Sabado, Noviembre 19, 2022.

An insidente segun sa inisyal na imbestasyon kan PNP si Divinagracia mantang nababa palang sa saiyang vehiculo sa saindang residencia sa Central Park Subdivision, Barangay Cadlan kan Pili, Camarines Sur binadil nin nagkaperang veces kan riding in tandem.

An biktima hali palang sa pag-atendir sa ginibong kawat sa basketball sa Pili Sport Complex mantang siya iyo an Commissioner kan 1st Governor Luigi Aguila Cup intertown basketball tournament.

Sinabi ni Provincial Director Col. Julius Cesar Domingo kan PNP Provincial Office sa Camarines Sur dai pa sinda makatao kan motivo sa krimen mientras na nagpapadgos pa an imbestigasyon.

Alagad sinabi pa kaini, calibre 45 badil an ginamit kan mga suspechado asin apat na bala an tuminama sa biktima.

Antes naglaog sa politica si Divinagracia naging general manager kan Pili Water District, envuelto sa pagtanum nin tubo, naging bise alcalde, consejal asin Bise Presidente kan Philippine Councilors League, CamSur Chapter kan taon 2016-2019. (dpa)