SA PANGGAGADAN KI BANDOJO: Imbestigasyon madali nangmaresolberan - NCPO

Pasiring na sa pagresolberan kan caso sa panggagadan ki Roselle Bandojo, 17 anyos, an Naga City Police Office (NCPO) sa nagpapadagos na imbestigasyon sa makangerat na krimen sa biktima.

Sa pag-atubang sa press conference ni Deputy City Director Lt. Col. Darius Sola kan NCPO, saiyang sinabi hali sa dating anom na ‘‘persons of interest’’ sa ngunian duwa na sana asin madali na sa proceso kan saindang imbestigasyon.

Igwa nang electronics evidence maging physical evidence saka makakatabang pa an testigos. Oras na maisangat na an casong pang-gagadan hahalaton na sana an mandamiento de aresto na pig-isyu kan jusgado, sabi pa kan opisyal.

Nangapodan an NCPO mantang yaon na sinda sa pag-monitor sa suspechado hagad ninda na magsuko na sana sa awtoridad.

An biktima na residente kan Barangay Peñafrancia pig-osip sa awtoridad na nawawara poon alas 8:00 nin banggui, Hulyo 22, 2023 nganing magbakal nin makakakan sa M.T. Villanueva Avenue sagcod na sana digdi dai na nakabalik sa saindang residencia.

Sabadong udto, Hulyo 29, 2023 nakua kan mga awtoridad na mayo nang buhay na patos sa tamong an bangkay kan biktima sa bakanteng lote sa Acacia St. Brgy. Liboton na ngunian M.T. Villanueva.

Mientras tanto, abot na sa P800,000 mil pesos an total na natipon na pabuya sa siisay man makakatukdo sa responsable sa krimen.

Kabali sa nagtaya nin tig-a P100,000 iyo sinda Congresista Gabby Bordado kan tercer distrito kan Camarines Sur, Alcalde Nelson Legacion, asin Nonoy Magtuto saka si Senador Raffy Tulfo cantidad P500,000.