SA PARTIDO AREA: Lokal na pelikula buhay na buhay

Ni Sonny Malate

GOA, Camarines Sur --- Padagos an paghimo nin mga local na pelikula sa Partido Area na nagigin contribuente sa pagparambong kan lengguaheng Bicol, cultura asin arte. An mga pelikulang ini an naaapreciar asin orgulyo kan mga taga Partido orug pa ta nakakaguno ini nin mga premyo sa mga film competition.

An Partido State University (ParSU) Goa main campus iyo an nangengenot sa paghaman nin local na pelikula sa Partido Area. An mga estudiantes digdi na may passion sa film making, sa atubang kan limitadong recursos,  sustenido an pagmawot kan suporta kan universidad na pinapamayohan ni Dr. Arnel B. Zarcedo, comunidad asin mga stakeholders.

Si Romen Cano, Adviser kan Talingkas Film Society (TFS), an nagpahayag nin dakulang kaogmahan asin orgulyo huli sa pambihirang onra na naguno kan entry kan ParSU sa 9th Sorok Short Film Festival (SSFF) kan nagtalikod na bulan. Hale sa 140ng entry sa bilog na nacion, an pambato kan ParSU nakalaog sa enot na doceng finalists.

An festival sarong taunan na proyekto kan Sorok Uni Foundation, may katoyohan na makapukaw kan pananaw kan comunidad sa mga presenteng realidad sa sociodad. Siring man, tanganing magin paagi sa pagpahiwas kan exposure asin pagtais kan talento kan mga filmmakers sa iba-ibang aspeto kan filmmaking.

An entry kan ParSU iyo an ''Princess and the Kings''. Ini nasa direction ni Ellen Guadalupe, assistant director sinda Marlon Pascua, Ken Clement Cobilla asin Cassandra Kate Padayao. Producer iyo mismo si Cano

An pelikula na nainspirar kan sarong fairy tale istorya dapit sa child sexual exploitation sa social media. Ngonian na taon, tema kan film festival iyo an ''Sigwa ng Musmos: Stop On-line Sexual Exploitation of Children''.

Sa ikapitong short film festival man kan DOH-Camarines Sur Treatment and Rehabilitation Center (DOH-CSTRC) sa pamamayo ni Dr. Ma. Lourdes Anson, an pelikulang ''Hawas'' kan ParSU an nakabali sa finalists. Nagpatiribayan iyo an mga entry hale sa mga colegio sa Bicol.

An film festival nagmamawot na magpagamiaw sa sociodad na may naghahalat na bagong buhay sa luwas kan Center sa mga individual na napasala nin dalan sa paagi kan pagkasugapa sa mga bawal na droga.

An ''Hawas'' nakaguno kan Viewers' Choice Award asin Residents' Choice Award. Director kan pelikula iyo si Lance Fernandez. Magigiromdoman na kan mga nakaaging taon, an ParSU nakakoa man nin mga mayor na premyo sa best picture,  acting, technical asin ibang awards.

Kan mga nagtalikod na semana sarong competition sa patiribayan sa paggibo nin pelikula an pig-initiar kan TFS sa paagi kan Talingkasine. Apat na mga pelikula an nagralaban para sa iba-ibang categoriya.

Mientrastanto, kan nakaagin semana, tolong pelikula kan universidad - ''Alo'', ''Perdita'' asin ''Hawas'' an nadalan nin libre kan publico sa luwas kan campus. Ini sa paagi kan Aniningal Film and Art Exhibit na sarong collaboration kan ParSU sa mga local art/music group asin famosong Let's Go Partido vlog.

Pigbuyagyag ni Cano na an film group kan ParSU padagos sa advocacia kaining pagparambong kan mayaman na cultura kan Partido sa paagi kan arte kan pelikula. Dawa na ngani limitado an oras asin recursos kan mga miembros kan grupo siya naglalaom na sa sa suporta kan comunidad sinda matrayumpo digdi.

ParSU entry na pelikulang “Hawas” kabali sa finalists sa DOH-CSTRC film festival. (Photo - ParSU)