SA PEÑAFRANCIA FIESTA: Labi sa 1-M debotos masungko ki Ina

Labi sa on milyon na debotos ni Nuestra Señora de Peñafrancia sa Ciudad nin Naga masungko ngunian na kafiestahan ni Ina mantang pig-andam kan Naga City Police Office an paz y orden katuwang an augmentation force hali sa PNP Bicol asin kan 9th Infantry Division kan Philippine Army.

An Department of Tourism (DOT) sa Bicol sa pamamayo ni Director Herbie Aguas maging an City Hall nagpahayag na haros taon-taon labi sa on milyon na debotos an nasungko ki Ina sa tahaw kan saindang dating patod na debosyon sa imahen sa Ina kan Bicolandia.

Mala ngani an mga turista hali sa ibang ciudades asin provincia maging hali sa ibang nasyon amay nagpareserba nin cuarto sa mga hotel kan ciudad asin sa pagtaraid na banwaan kan Naga.

An DOT sa saindang record na nagpapaheling na an Festividad ni Ina pigdadayo nin turista na padagos kan saindang debosyon.

Kan Septiembre 8, 2023 iyo an ginibong Traslacion procession o pagbalyo kan imahen asin Divino Rostro hali sa Peñafrancia Shrine pasiring Naga Metropolitan Cathedral para sa siyam na aldaw na novenario.

Sa Sabado, Septiembre 16 iyo an Fluvial procession o pagbuelta kan imahen sa Peñafrancia Basilica Minore na dinudomog nin mga debotos sundo sa kapiestahan maging pakalihis kan aldaw igwa pang ribo-ribong nagsusunko sa simbahan.

Nakakaangat sa lado nin mga negosyo sa ciudad an mga turista mantang dakul man an nagdadayo pa sa Ciudad nin Legazpi nganing magbisita sa bantogan na Volcan Mayon, sabi kan DOT.

Si City Director Nelson Pacalso kan NCPO nagtutubod na magiging matuninong an kafiestahan ni Ina siring kan ginibong Traslacion procession.

Afuera kan actividades kan simbahan an City Hall igwa man civic asin military parade asin iba pang mga programa na pigdadayo nin mga bisita.