SA PICE CAMSUR CHAPTER: Depekto sa edificio matapos kan linog tinukdo sa MDRRMOs

Dakulang tabang kun iguang nangyaring linog sa pag-evaluar kan kapusogan nin edificio para sa dagdag kaaraman kan mga MDRRMOs kan LGUs sa tercer distrito kan Camarines Sur asin iba pang representantes hale sa mga Municipal Engineer’s Office asin iba pang ahencia na naka-participar sa duwang aldaw na Disaster Risk Program – Pre-Earthquake Evaluation of Buildings: Rapid Visual Screening of Building Potential Seismic Hazards – FEMA 154 Level 1 na ginibo kan Agosto 29-30, 2024 sa 3rd District Engineer's Office kan DPWH sa Baras, Canaman, Camarines Sur.

Natukdoan an mga MDRRMOs asin iba pang participantes hale sa 1st, 2nd, asin 3rd Engineering District Offices na dawa an iba bakong ingeniero nahasa kun panong madidiscobre na an sarong edificio igua nang depekto matapos kan linog na dapat maaraman tolos kan okupantes nganing ma-inspeksyon asin ma-evacuar an kamugtakan sa edificio.

Padreno sa seminar iyo an Philippine Institute of Civil Engineers, Inc. Camarines Sur Chapter (PICE) na pinamamayohan kan saindang Chapter President Engr. Ryan S. Guevarra.

An saindang resource speakers sa seminar hale man sana sa saindang organisasyon asin Engr. Hernany O. Sibulo, Engineer II, bilang juespe de honor na may kabatiran sa Disaster Risk Management.

Si Sibulo sarong Master in Public Administration, 27 anyos na sa serbisyo sa gobierno, accredited project engineer, safety officer, Building Construction Safety Audit Inspector asin pioneer kan Canaman Rescue and Medical Assistance 2001.

Saindang nahimo an programa sa tahaw na kadakli kan mga pag-ensayo sa LGUs asin iba pang ahencias de gobierno maging pribadong kompanya iyo an earthquake drill alagad sa lado kan MDRRMOs na kadakli bakong ingeniero kulang sa pagkasabot asin maninigo an saindang programa nganing makatabang bako lang sa lado kan gobierno maging pribadong kompanya.

Narealisar an programa sa tabang kan 3rd Camarines Sur Engineering District kan DPWH sa pamamayo ni DE Romeo Doloiras na nagpagamit kan saindang Multi-Purpose Building.

Nag-aatendir sa duwang aldaw na seminar sa Disaster Management Program na padreno kan PICE Camarines Sur Chapter.