SA PILI, CAMARINES SUR: Inagurasyon kan bagong mercado sa Marso 15

Pigtalaan an blessing and inauguration ngunian na Viernes, Marso 15, 2024 an mahiwas asin duwang escalon na mercado publico kan Pili, Camarines Sur na papangenotan ni Alcalde Tomas Bongalonta mientras na bisita si Senador Bong Go.

Sinabi ni Alcalde Bongalonta an bagong bonggang mercado cantidad P240-M an phase 1 asin an phase cantidad P37-M narealisar sa tabang kan senador asin kabali sa milyones peso na saiyang nasakdo kan panahon na suspendido siya sa opisina kan Capitolio Provincial nin anom na bulan.

Alagad orgulyo kan mga taga Pili huli ta kumpleto na igwang elevator, cool storage, mahiwas an parking area na may capacidad sagcod sa sangatos na pribadong vehiculo, jeep, tricycle asin padyak terminal.

An iba pang na-aprubaran na proyecto iyo an Department of Agriculture Slaughter house may cantidad P50-M na finance kan World Bank asin proyecto sa Super Health hali sa Department of Health.

An mga proyektong ini tanda na padagos na pag-asenso kan Kabesira kan provincia sa tahaw kan mayoriang miembros kan Sangguniang Bayan contra partido kan jefe ejecutivo, sabi pa.

BAGONG MERCADO PUBLICO KAN PILI, CSUR. Nangyari na an pangiturogan kan namamanuan kan Kabesira kan Camarines Sur na magkaigwa nin bonggang mercado na nakatalaan gibohon an ‘‘blessings and inauguration’’ ngunian na Marso 15, 2024 bisita si Senador Bong Go. (Retrato hali sa FB ni Alcalde Bongalota)