SA PILI, CAMARINES SUR: MDRRMO dai kabali sa 2026 annual budget

Inaprubaran kan Sangguniang Bayan kan Pili, Camarines Sur antes nagtapos an taon 2025 an P600-M na annual budget para sa ngunian na taon alagad hinahanap ni Bise Alcalde Tomas Bongalonta, presiding officer kan SB kun tano ta dai kabale sa budget an P31-M para sa MDRRMO.

Sinabi ni Bongalonta sa Bicol Mail na nagpadara na siya nin formal letter sa opisina ni Alcalde Marivic Solano na hinahagadan nin paliwanag sa isyu kan MDRRMO budget na maabot sa P31-M o cinco por ciento kan 2026 annual budget alagad mayo pang kasimbagan.

Sinumiter sa SB an 2026 proposed annual budget antes kan Deciembre 15, 2025 alagad saiyang pighahapot kun tano ta dai kabale an P31-M para sa MDRRMO budget.

Sain makua nin fondo an opisina kan jefe ejecutivo na dakulang kahapotan, sabi pa kan presiding officer.

Mayong nangyaring pagsasabotaje an SB na saiyang pinamamayo nganing abalahon an pag-aprubar kan annual budget sagcod na tapos an taon 2025, alagad nangyayari ini na dai na-aprubaran tolos an annual budget sa saiyang administrasyon kan iyo pa an alcalde huli sa pamumolitica kan mayoria sa miembros kan dating composisyon kan SB. Sa ngunian hinale niya an ngaran na politica nganing dai ma-apektaran an basic services kan LGU asin iba pang mga proyekto na dapat maimplementar.

Kan panahon ni Bongalonta komo jefe ejecutivo saro sa dai naimplementar na proyekto iyo an evacuation center hale sa tabang kan PAGCOR huli sa dai pag-aprubar nin resolusyon kan dating composisyon kan SB.

An Pili iyo an kabesira kan Camarines Sur asin iyo an may pinakadakulang annual budget sa mga LGUs sa provincia.