sa PLEBISITO SA NOV. 21: Senior citizen, PWDS makakaboto nin amay

Ipapadagos giraray kan Commission on Election (Comelec) an amay na pagboto sa sektor nin senior citizen, bados asin PWDs sa nakatalaan na plebisito sa Noviembre 21, 2026 sa Ciudad nin Naga.

Si Election Officer Atty. Maico Julia Jr. nagpahayag sa Bicol Mail an sinambit na sektor pwedeng makaboto poon alas 5:00 hasta alas 7:00 nin aga.

Kan nakaaging mga lokal asin nasyonal na eleksyon an senior citizen asin PWDs tinutugotan nang makaboto nin amay huli ta paborable sa saindang oras.

An nakatalaan na plebisito sa Ciudad nin Naga papapilion an mga botantes kun pabor o contra na maging Highly Urbanized City an ciudad. Sa ngunian nagpapadagos na an campaign period poon kan Oktubre 19 nganing ipasabot kan City Hall an karahayan kun saro nang HUC an Naga.

Si Presidente Ferdinand Marcos Jr. nagtugot na maging HUC an ciudad alagad kaipuhan mag-agi sa plebisito.

An Comelec, segun ki Julia andam na kan saindang personahes asin mga paratukdo sa pigtalaan na plebisito.

Cantidad 50 milyon pesos an gagamiton na fondo mientras na an cantidad 30 milyon pesos hale sa Comelec asin 20 milyon pesos hale sa LGU kan ciudad.

Igua nang pigtalaan na mga precinto an Comelec sa 27 barangay na gagamiton an mga escuelahan na si dating ginagamit cada lokal asin nasyonal na eleksyon.