SA PNR BICOL EXPRESS: Modernisasyon ipapaubaya na sa masunod na Presidente

Dapat ipadagos kan masunod na Presidente an modernisasyon kan Philippine National Railways Bicol Express alagad posibleng magsikad man giraray an multi-billion peso na proyecto antes magtapos an termino ni Presidente Rodrigo R. Duterte.


Saro ini sa pig-urulayan sa ginibong Regional Development Council (RDC) meeting na pinamamayohan ni Legazpi City Mayor Noel Rosal kan Febrero 2021 kabale an Bicol International Airport sa Daraga, Albay na pinangako kan kontraktor matatapos sa Septiembre ngunian na taon.


Ini an mga pahayag sa Bicol Mail ni Presidential Adviser for Bicol Affairs dating Juez Marvel Clavecillia, alagad an inaatubang na problema kan China Railway Engineering (CRE) iyo an road right of way bako lang sa ribo-ribong squatters.


Sinabi pa ni Clavecilla igwa nang pig-down load an gobierno nasyonal nin Php800 milyon para sa feasibility studies sa implementasyon sa piglalangkag nang modernisasyon kan perokarril.

PNR Bridge sa barangay Taban-Inalahan, Libmanan, Camarines Sur labi na sa 60-anyos alagad pusog pa asin aroaldaw inaagihan kan Commuter train na viajeng Naga Sipocot.



Panahon pa kan yaon sa puesto an Bicolanong Cesar Chavez bilang undersecretary kan Department of Transportation asin sa ngunian yaon na sa ika-limang taon sa Malacañan si Duterte madiklom pa an paglaom kan Bicolanong pasajeros.


Sinabi kaidto ni DOTr Secretary Arthur Tugade an time table puon 2018-2022 alagad sagcod sa ngunian dai pa narerealisar matatapos nalang an termino ni Duterte.


An train stations hale sa Paco, Manila, abut sa Matnog, Sorsogon na mapalaba asin lakbang kan 638 km na bagong konstruksyon kan railways kaparejo na sa international standard.


An administrasyon ni Duterte naka-utang na nin P175-B sa nasyon kan China para sa modernisasyon kan Bicol Express.


An utang babayadan kan gobierno kan Filipinas sa laog nin 20 anyos asin dos por cientong interest per anum.


Sa entrevista ki Greg Mano, jefe kan PNR Bicol sinabi kaini sinda asin an CRE kaibanan an saindang Engineering Department nagconducir na nin satellite survey kan 2019 sa mga PNR railways sa Camarines Sur, Albay sagcod na nagbisita sa Sorsogon mantang kabale an provincia sa program re-routing mantang magkakaigwa na nin bagong desinyo para sa makaskas na dalagan kan train na aabuton nin sagcod sa anom na oras an viaje haling Manila sundo sa Matnog, Sorsogon.


Sa saindang survey dakul an mga kurbadang lugar sa Camarines Sur asin Albay kaya magkakaigwa nin problema sa road right of way. (DPAureus)