SA PNR BICOL: MBE madiklom pang marealisar sa administrasyon ni Marcos

Madiklom pa an paglaom kan mga Bicolano sa presenting administrasyon ni Presidente Marcos an Modern Bicol Express (MBE) na rutang Calamba-Laguna sundo sa Matnog, Sorsogon envez an prayoridad kan presenting manijamiento kan perrokaril iyo an North-South Commuter Railway (NSCR) na midbid sa apod na Clark-Calamba Railway, na iguang 147 kilometros asin iguang fondong P870-B.

Si PNR General Manager Deovanni Miranda nagsabi sa ‘‘Face the Nation program’’, an proyekto sa Bicol na 566 kilometer South Long Hall dai pa maponan envez naglalaom sinda na marealisar an proyekyo sa paagi kan Private-Public Partnership (PPP).

Magigirumduman kan yaon pa sa posisyon sa Camara-Baja si Representante Gabriel H. Bordado Jr. kan tercer distrito kan Camarines Sur sa cada deliberasyon sa budget kan gobierno nasyonal permi siyang na ‘‘interpellate’’ sa Chairman kan Appropriation Committee kun kabale na an fondo sa rehabilitasyon kan PNR Bicol alagad an mamundo dai pigbabale sa General Appropriation Act (GAA).

Sa programa kan PNR dapat marealisar an proyekto sa NSCR asin Bicol sa 2027 hasta 2032.

An nagpapadagos na proyekto sa NSCR magiging moderno mala ngani an saindang gagamiton na bagong mga bagon na haling nasyon kan Japan mantang si mga loma iyo an dadarahon digdi sa Bicol, sabi pa kan general manager.

Pigbuyagyag pa na an rutang Laguna-Bicol iguang presenting 35 porcienteng lote na kaipuhan pa ninda an dugang na 65 porciento. Kaipuhan pa na mapahale an mga ‘‘settlers’’ sa mga gilid kan relis kan PNR mantang hagad ninda an tabang asin cooperasyon kan mga LGUs na ma-relocate sinda sa laog nin duwang taon.

Sinabi pa kan manijamiento na maninigo pa an fondo para sa gagamiton na right of way sagcod na gibohon ninda an ‘‘expropriation’’ para sa right of way.

Ruta kan PNR Commuter train sa Camarines Sur haling Ciudad nin Naga asin Lupi mantang sa Albay haling Ciudad nin Naga asin sundo sana sa Ciudad nin Legazpi. (Bicol Mail)