SA RAGAY, CAMARINES SUR: DOTr nagcierto na hihirahayonan naraot na relis kan PNR Bicol

Nagtaong asegurasyon an Department of Transportation (DOTr) asin Philippine National Railways (PNR) na kabale sa saindang hihirahayon iyo an naraot na relis kan perrokaril sa tulay kan Barangay Apad asin Cale, Ragay, Camarines Sur mantang nagpapadagos an saindang rehabilitasyon kan linya kan train sa Bicol.

Ini an kasimbagan ni DOTr Secretary Giovanni Lopez ki Representante Hori Horibata kan premirong distrito kan Camarines Sur kasunod kan saiyang surat sa ahencia matapos maraot an relis kan PNR bridge kan nakaaging bagyong Uwan.

Sinabi kan DOTr na dai papabayaan kan ahencia an danyos mantang nagpapadagos an rehabilitasyon kan mga linya kan perrokaril sa Albay asin Camarines Sur.

An representante kan premirong distrito kan provincia tolos man nagpasalamat sa DOTr huli sa makaskas na aksyon nganing mahirahay tolos an danyos kan relis sa sinambit na tulay kan perrokaril.

An tulay dawa dai pa nin viaje kan Bicol Express Naga-Manila, alagad nagagamit bilang transportasyon kan skates.

Sa ngunian an ruta sana kan Bicol Express Naga-Lupi Viejo asin Naga-Legazpi. Barato an flete, iguang discuento sa PWDs, estudiantes asin senior citizens.