SA RBH7 o ECONOMIC CHA-CHA: Pighidali na pag-aprubar kanCamara-Baja, kinokondena

Nagkakasararo an grupo nin mga paraoma asin iba pang sektor nganing kondenaron an ‘‘niratsadang’’ pag-aprubar kan Camara-Baja sa RBH7 o Economic Charter change sa 3rd and final reading sa 288-8-2 resulta kan borotohan.

Sa statement kan Kilusang Magbubukid ng Pilipinas (KMP) asin iba pang sektor na pinaluwas sa FB post kan BAYAN Camarines Sur saindang pigdedenuncia an pighidaling pag-aprubar kan RBH 7 sa laog sana nin perang aldaw.

Nagtutubod sinda na bakong harayo an posibilidad an political amendments sa konstitusyon nganing mapalawig an termino kan mga elihido opisyal.

Sa marikas na deliberasyon ginamit kan mga lehislador an mayoriang grupo kan administrasyon ni Presidente Ferdinand Marcos Jr. nganing aprubaran an RBH 7. Pigkokondena ninda an arog kaining historicong nangyari sa Congreso nganing ma-enmiendahan an 1987 constitution.

Sa walong nagbotong contra sa pag-enmienda kan konstitusyon duwa sanang Bicolano na sinda Representante Gabriel H. Bordado Jr. kan tercer distrito kan Camarines Sur asin Rep. Edcel Lagman kan segundo distrito sa Albay. An iba pang nagcontra sinda Kabataan party-list Raoul Manuel; Eduardo Villanueva kan Cibac party-list; MuJiv Hataman kan Basilan; Paolo Duterte kan Ciudad nin Davao; France Castro kan ACT Teachers party-list; asin Arlene Brosas kan Gabriel party-list.

Sinabi pa kan KMP malinaw na mga negosyanteng lokal asin dayuhan an makikinabang sa pagbabago kan 1987 constitution asin mga interes sana kan dayuhan para sa saindang public utilities, basic education asin advertising, magin paglaog kan foreign direct investments sa nasyon sa tahaw kan langtadan nang napapaboran kapital asin negosyo an lokal na economia.

Dai mahahaloy mamamayagpag an dayuhan nganing makasadiri nin kadagaan asin yaman kan nasyon, sabi pa.

‘‘Hindi Charter Change, kundi tunay na reporma sa lupa, pagkain, kabuhayan at serbisyong panlipunan ang sigaw at panawagan ng mamamayan’’.

Sa ngunian yaon na sa Senado sa pamamayo ni Senate President Migz Zubiri an bola kun saindang susuportaran an RBH 7 na kaipuhan an 18 boto kan mga senador nganing aprubaran.