SA RICE TARIFFICATION LAW: Maa-amiendaran, pangako ni Robredo sa Sumilao Farmers

Nagtitiwala an Sumilao Farmers sa presidential candidate na si VP Leni Robredo na marerealisar na asin ma amiendaran an nagpapasakit sa paraoma Rice Tariffication Law na mas midbid sa Acta Republica 11203 oras na siya an manggana sa presidential election sa Mayo 9, 2022.

Nag-olay na an grupo nin paraoma asin an Bicolanang presidential candidate sa isyu na dapat marealisar sa masunod na administrasyon na ma amiendaran an RA 11203 na tolong taon nang pinapasakitan an paraoma sa pagparababa kan presyo nin paroy. An nakikinabang kan ley iyo an mga higanteng rice traders sa nasyon.

Ini an mga pahayag ni Ka Rene Cerilla kan Lopez Irrigators Association na kabale sa grupo kan Sumilao Farmers kan mag-atubang sa press conference sa Ciudad nin Naga matapos sindang maghapit sa ciudad.

An isyu sa RA 11203 pigcierto ni Camarines Sur 3rd district Congressman Gabby Bordado na sa masunod na 19th congress masangat siya nin house bill nganing dagos nang ma-amiendaran an ley na dai madidihado an paraoma mantang suportado na ini ni presidential candidate VP Leni.

Sinda mainit na sinabat kan Solid Leni Bicol, mga paraoma, jovenes asin iba pang stakeholders kan makaabot sa Ciudad nin Naga kan Abril 17 sa ika-20 diyas nang paglakaw hale sa Bukidnon.

Nagkaigwa man sindang panahon na makaulay sa Ciudad nin Naga si presidential candidate VP Leni Robredo.

An sinambit na organisasyon nin paraoma na hale pa sa Sumilao, Bukidnon enot nang nagkaigwa kan Lakad ng mga Pamilyang Magsasaka laban sa Gutom at Kahirapan 15 taon na an nakaagi kan sinda naglalakaw sinabat sinda ni Abogada Leni Robredo asin Alcalde Jesse Robredo kan taon 2007.

An tandem ninda Robredo-Kiko iyo an saindang sinusuportaran huli sa paglaom sa gobiernong tapat ni Robredo.

Hale sinda sa Sumilao, Bukidnon kan Marso 28 asin target na makaabot sa Manila sa Mayo 7, 2022 nganing dagos nang makaatendir sa miting de avance kan Robredo-Kiko tandem.

Sinabi pa kan grupo ‘‘Kami po ang naglalakad na resibo o buhay na ebidensiya ng mabuting pamamahala at paglilingkod sa bayan ng Tropang Leni-Kiko. Lahat po kaming naririto sa inyong harapan ay may iba’t ibang kuwento at karanasan papel lalo na ni VP Leni sa pagbabago ng aming buhay.’’

Sa saindang pahayag pa sa media ‘‘Nagtitiwala kami na sa administrasyon Robredo Pangilinan, hindi naman kailangan mag hunger strike para lamang bigyan ng atensyon ang aming mga hinaing. Dahil sila mismo ang lalapit sa amin upang kami ay marinig. Dahil kaimi ay makakasama sa anumang mga pagdedesisyon na gagawin na nakakaapekto sa mga magsasaka’’. (DPAureus)