SA RINCONADA DISTRICT: BLPC mabugtak sadiring kumpanya nin kuryente

Si Camarines Sur 2nd District Congressman LRay Villlafuerte nagpahayag na dai ma-take over sa manijamiento kan Camarines Sur III Electric Cooperative (Casureco III) kun maaprubaran an franquicia kan Bicol Light and Power Corporation (BLPC) envez mabugtak nin sadiring pribadong kompanya nin kuryente sa Rinconada district.

An congresista kan segundo distrito iyo an padreno sa Camara-Baja kan House Bill 4437 sa hinahagad na franquicia kan BLPC asin nakalusot na sa Committee on Public Services sa senado na pinamamayohan ni Senador Grace Poe alagad nag-aatubang sa controvercia sa Casureco III sa Rinconada district matapos irecomendar na sa senado nganing aprubaran.


Sa intrevista kan estasyon nin radyo kan BBS FM sa Ciudad nin Naga, piglinaw kan congresista na mayong katutuanan an paghadit kan manijamiento asin miembros-consumedores kan Casureco III na ma-take over an BLPC mantang nag-aatubang nin dakulang mga pagkaka-utang an cooperativa.


Natuyawan an Casureco III ta pina-aprubaran sa ginibong huring Annual General Membership Assembly (AGMA) an kokolektahon na Php20.00 sa electric bill cada bulan komo saindang reserbang fondo na gagamiton encaso may mangyaring calamidad.


Inangat pa kan lehislador an manijamiento kan cooperativa sa pamamayo ni Acting General Manager Engr. Wilfredo Bucsit na iluwas sa publico an mga pangaran kan may dakulang pagkaka-utang.


An pagkaigwa nin saro pang kumpanya nin electricidad matatawan an miembros-consumedores na makapili kan marhay na serbisyo asin hababang tarifa sa kuryente.


An House Bill No. 4437 entitled ‘‘An Act granting the Bicol Light and Power Corporation a franchise to construct, install, established, operate, own, manage and maintain a power distribution system for the conveyance of electric power to end users in the towns of Baao, Balatan, Bato, Bula, Buhi, Nabua and the City of Iriga province of Camarines Sur and for the purposes’’.


PANINDUGAN KAN BECA


Alagad an Bicol Electric Cooperative Association (BECA) nagpaluwas kan saindang resolusyon na kinukundenar ninda an report kan Senate Committee on Public Services sa pamamayo ni Senador Poe huli ta pigrecomendar tolos na aprubaran asin an ‘‘amendments’’.


Sinabi pa sa resolusyon kan BECA kun matatawan franquicia an BLPC, an tarifa sa kuryente malangkaw, puede pang magduble. Ini base sa pahayag kan representante kan Energy Regulatory Commission sa ginibong enot na hearing sa Senate Committee on Public Services kan Febrero 20, 2018 asin sa ika-duwang hearing kan komite kan Septiembre 18, 2018.


Si Abogado Vicky Briones, Co-Chairman kan Task force Rinconada nagsabi na iba an mangyayari sa cooperativa nin electricidad kun may kumpentencia, ‘‘iba an situasyon sa distribution utilities tinututogan an natural monopoly huli ta an billing na-determined kun sadit diit an mabaranga an resulta an tendency malangkaw’’.


Pinadarahan na kan BECA kan saindang resolusyon an gabos na miembros kan Senado, Department of Energy, Energy Regulatory Board, National Electrification Administration para sa reconsiderasyon. (dpa)