SA RINCONADA DISTRICT: Gob. Migz macandidatong cong., Fortuno nagpahunod
Amay pigdeclara an candidatura ni Gob. Migz Villafuerte (sa tahaw) ninda dating Congressman Sal Fortuno (sa wala) asin incumbent Congresswoman Jo ‘‘Sal’’ Fortuno kan Rinconada district kan Camarines Sur. (DPAureus)
Ipinasa na ni Congresswoman Jo ‘‘Sal’’ Fortuno an saindang bandera sa politica sa 5th congressional district kan Camarines Sur sa last termer Governor Migz Villafuerte nganing iyo na an magdalagan sa cargong diputado kan Rinconada district sa maabot na pirilian sa Mayo 2022.
Nabigla alagad mayong nagcontrang mga alcalde asin lider sa politica kan incumbent congresswoman na premiro pa sanang termino kan pangenotan kan saiyang esposo, dating diputado Salvio Fortuno an pag-anuncio na ipapahunod ninda an pagpadagos sa politica sa joven na gobernador.
An actividad ginibo kan Sabadong hapon, Deciembre 19 sa Iriga Plaza Convention sa presencia ninda 2nd District Congressman LRay Villafuerte, 5th District Congresswoman Jo ‘‘Sal’’ Fortuno, Provincial Administrator Luigi Villafuerte na macandidato man gobernador, Gob. Migz Villafuerte, mga incumbent mayors na kaalyado ni Fortuno, dating alcalde, consejal, mga vocal kan Rinconada district asin mga Liga nang Barangay President.
Dikit nang maging ‘‘emotional’’ an dating diputado kan saiya nang i-anunciar an desisyon kan saindang mag-agom na presente an saindang familia na ipahunod an saindang bandera sa politica sa paluwason nang gobernador kan Camarines Sur.
Dakul an mga kahapotan kan saindang mga lider kun arin sa duwang Fortuno an madalagan envez na suprisa kan anuncio alagad an paliwanag kan dating diputado iyo an saiyang salud.
An aking lalaki na si Sal Fortuno Jr. iyo an pig-anunciar sa sinambit na tiripon na macandidatong vocal sa Rinconada district.
Si Sal Fortuno, nag-serbe sa Rinconada district bilang diputado sa laog nin doceng taon nagsabi pa na nagkaperang veces na siyang nagpa-medical check-up sa pinsan niyang doktor sa Philippine Heart Center sa Manila mala ngani sa nagkaperang resulta sa laboratory test an aviso kan doktor kun gusto pang maglawig an buhay dapat magpuon nang likayan an ‘‘stress sa buhay’’.
‘‘Siempre gusto ko maglawig pa an buhay ko tanganing mag-enjoy pa kita, so I decide na magpahingalo muna sa politica’’.
Saiya pang pig-osipon na si diputado LRay iyo an nagpa-candidato sa saiyang esposa na inako an alok alagad huli ta bako man siyang politico an kondisyon dapat saro sanang termino.
Nagrarani na an eleksyon amay nang pig-anunciar nganing andaman kan gobernador an batalya nin politica sa arin man sa familia Alfelor na masabat saiya.
Si Congresswoman Fortuno na iyo an chairman kan Committee on Rehabilitation sa Camara-Baja nagpahayag man nin pasasalamat sa pagtao saiya nin opurtonidad na magserbe bilang representante kan saindang distrito. (DPAureus)