SA ROAD CLEARING OPERATION: Pag-garaba kan waiting shed dapat may permiso sa COA

Posibleng mag-atubang nin caso sa Ombudsman an arin man na envueltong opisyales lokal asin barangay kun gagabaon an mga nakatindog na waiting shed na daing permiso sa Commission on Audit (COA).


Ini an mga pahayag ni Vocal Angel Naval kan tercer distrito kan Camarines Sur sa tahaw kan nagpapadagos na mga clearing operation kan LGUs asin barangay komo pagsunod sa directiva kan Department of Interior and Local Government (DILG) na dapat an gabos na estractura na ulang sa tinampo asin road right of way haralion.


An mga waiting shed na pinatindog nin mga politico yaon sa record kan LGU kun saen na lugar, alagad kun magkaigwang inbentaryo an COA na ginaraba na na mayong paisi sa commission igwang sisimbagon an siisay man na responsableng opisyal, sabi pa ni Naval.


Dawa ginaba na pati na an mga kabalye dapat igwang tamang kustodiya nganing kun hanapon ipapaheling sa COA.


Napag-aram kan vocal na nagkapera nang mga LGU pinagaraba an ibang waiting shed na yaon sa laog kan road right of way alagad dai nag-agi sa COA.


Pighalimbawa kan vocal kan tercer distrito kan CamSur antes pigpunan kan gobierno provincial kan Camarines Sur an pagpagaba kan lomang edificio kan Capitolio naghagad sinda nin permiso sa COA na inabot nin anom na bulan antes naaprubaran.


Sa paghagad nin permiso sa COA dapat igwang program of work asin plano asin nagkapera pang proceso.


Saro pa sa pig-ehemplo ni Naval iyo an plano kutang pagpagaba kan Barangay Hall in the Sky sa Camaligan, Camarines Sur nganing masunod an enot na directiva sa road clearing operation alagad dai nangyari mantang dakul na mga kahapotan na dapat ipaliwanag sa COA.


Si Provincial Director Melody Relucio kan DILG Camarines Sur nagpahayag na pigtalaan na sa Febrero 16 hasta Marso 2 an Validation Version 2 sa road clearing operation kan LGUs.


An ika-duwang road clearing operation kabale na an barangay piglalaoman na antes mag-abot libot an DILG Validation Team nahale na an mga ilegal na estractura sa mga road right of way kaayon na an mga sidewalk.


Sinabi pa kan DILG an arin man na dai makakapasar sa road clearing operation, igwang sisimbagon an LGU sagcod na sangatan nin caso administrativo. (dpa)

Retrato kan lomang edificio kan Capitolio Provincial kan Camarines Sur inabot nin anom na bulan antes na-isyuhan nin permit kan Commission on Audit (COA) na puede nang gabaon.