SA ROAD WIDENING KAN DPWH: Manga poste asin poon nin kahoy ulang sa proyekto

Mga ulang na poste kan Camarines Sur II Electric Cooperative (Casureco II), telco poles asin darakulang poon nin kahoy iyo an dapat mahali sa road widening sa Peñafrancia Ave-San Felipe kan Department of Public Works and Highways (DPWH).

Ini an pigbuyagyag ni Engr. Sean Serrano kan CSur 3rd Engineering District kan DPWH kan siya maging bisita sa sesyon regular kan Sangguniang Panlungsod kan Ciudad nin Naga.

Maabot pa sa 69 poon nin kahoy an apektado sa Barangay Peñafrancia asin San Felipe alagad sa entrevista kan Bicol Mail sa Casureco II spokesperson Rinner Bucay, sinabi kaini kinakarkulong cuarentang poste an nakatalaan magabot asin ibalyong lugar.

Sa report pa kan Project Engineer sa SP nasa 100 por ciento nang tapos an road widening sa Peñafrancia Ave; mantang sa road widening sa San Felipe nasa 25 por ciento pa sana. Nagkapera sa isyu na nasabat kan DPWH sa Barangay San Felipe projects kabali an road right of way asin kakulangan fondo para sa kabayadan sa lote.

Si Project Engr. Sean Serrano (nakatalikod) kan Camarines Sur 3rd Engineering District kan DPWH mantang sa atubangan niya si Consejal Vidal Castillo na hinuhurot sa Proj Engr na ipapurotol nang amay an mga poon nin kahoy nganing mayo nang magprotestang environmentalist. (Retrato kan SP)

Igwa nang permit to cut an Department of Environment and Natural Resources (DENR) alagad dai paman sinabi kun nuarin pupurotolon an mga ulang na kahoy sa road widening project.

Igwa pang ibang estraktura an kinakaipuhan mapahali huli ta yaon na sa laog kan road right of way an problema naman iyo an kakulangan pa nin fondo kan ahencia.

Si Consejal Vidal Castillo, Chairman kan Committee on Infrastructure sa Sangguniang Panlungsod hinurot na sa DPWH na kun igwa nang permit to cut an DENR dapat dai pagparahaloyon huli kan posibleng makiaraman naman an ibang environmentalist.

Kan mga nakaaging taon naabala si pagpurotol huli ta pigcuestion pa sa corte kan environmentalist alagad mayo man sana nangyari asin pinaboran kan corte an pagputol mantang igwa nang permit sa DENR.