SA SCHOOL SHOOTING: NCPO mawarak mga miembros kan PNP sa mga escuelahan

Kasunod kan nangyaring school shooting sa Ciudad nin Tacloban, an Naga City Police Office sa pamamayo ni P/Col. Rizaldy Caballero, OIC City Director, pinahayag kaini na mawarak sinda nin mga patrol police sa mga escuelahan mantang nagpagirumdum sa mga magurang na bantayan asin regular na reparohon an online na actividad kan saindang mga aki orog na sa gaming asin social media platforms.

Sinabi pa na nakatalaan sinda magcoordinar sa mga magurang asin escuelahan para sa seguridad kan mga paratukdo asin estudiantes.

An directiva kan saindang higher command saro pigtatawan prioridad para sa paz y orden sa mga escuelahan.

An nangyaring school shooting sa San Jose National Highschool sa Ciudad nin Tacloban causa kan bullying base sa imbestigasyon kan PNP na kun haen tolo an nagadan asin biente an iredong mga aki mantang an duwang suspek nag-eedad nin 14 asin 15. Calibre 38 asin 9MM an ginamit kan mga suspek.

Sinabi kan NCPO dawa na ginigibong libangan kan mga aki an social media alagad iguang maraot na pinapaluwas na impormasyon na prohibido pa sa mga minor de edad.

Sinabi pa kan NCPO ‘‘Dapat ipasabot kan mga kamagurangan na tukduan an saindang mga aki mapadapit sa online safety, pauswagon an responsableng paggamit kan internet, suri-on an privacy settings kan saindang mga account, asin imantenir an bukas na komunikasyon mapadapit sa saindang mga online sa pakikipag-ugnayan.’’

Afuera pa kaini, nagpagirumdum pa an NCPO sa mga administrador kan escuelahan, mga maestra asin maestro, asin iba pang opisyales na perming reparohon an estudiantes asin dapat dai mag-alangan orog na sa isyu sa seguridad, sabi pa sa FB page kan NCPO.

Sa lado kan Parent Teachers Association, dapat maging estricto man an mga seguridad sa mga naglalaog na estudiantes sagcod mag-inspeksyon kan saindang darang bag sa escuelahan.

Sinda PRO5 BGen Erosito Miranda, Regional Director, asin Alcalde James Paul Ranin, kan Bombon, Camarines Sur asin iba pang opisyales kan PNP nagpirirmahan sa donasyon kan lote para sa construksyon kan bagong edificio kan Bombon MPS. An seremonya ginibo sa PRO 5 Camp BGen Simeon Ola, Ciudad nin Legazpi. (PNP Kasurog Bicol)