SA SENIOR CITIZENS SA BICOL: 200K target mabakunahankan DOH vs sa trangkaso

Abot sa 200,000 na senior citizens sa Kabikolan an nasa listahan kan opisina rehiyonal kan Department of Health (DOH) nganing magpabakuna kontra flu o trangkaso.

Sinabi ni DOH Bicol regional director Ernie Vera objetivo kan saindang ahencia para sa proteksyon contra sa mga helang siring kan pulmonya o trangkaso.

Kan nakaaging semana nagsikad na an programa sa anom na provincia kan rehiyon sa pagtatarabangan kan mga lokal na gobierno, municipal asin city health office maging kan mga Barangay Health Workers, sabi pa ni Vera.

Sa enot na semana kan barakunahan nakarecibe kan single dose kan flu vaccine iyo an mga indigent senior citizens asin sunod an mga non-indigent na kaparejong sektor mantang sa ikaduwa hasta ikaapat na semana kan bulan.

Pigtalaan na kan DOH na an isusunod iyo an vulnerable sector siring kan bados, igwang comorbidities saka mga health workers maging sa frontline service.

Hinagad kan ahencia an kooperasyon kan mga senior citizens sa barangay na aprubetsaran an libreng bakuna mantang para man sana sa proteksyon kan saindang salud.

Mientras tanto, sa report kan ahencia sa caso sa Covid-19 igwa pang nagkaperang mga caso na base sa listahan kan Oktubre 1 hasta 7, 2023 sa Albay igwang duwang caso sa Ciudad nin Legazpi; Camarines Norte – zero; Camarines Sur – onse na naghahale sa mga banwaan kan Baao igwang duwa, duwa sa Libmanan; tigsararo sa mga banwaan kan Buhi, Calabanga. Gainza, Minalabac, Nabua asin sa Ciudades kan Naga asin Iriga; saro sa Catanduanes; duwa sa Claveria, Masbate; tolo sa Ciudad nin Sorsogon asin saro sa Casiguran.

Dawa dikit na an caso sa Covid-19 alagad an DOH nagpapatanid sa publico na maglikay man giraray sa virus.