SA SEPTEMBER 13, 2021: 1.7-M target na enrolleessa burokasan klase - DepEd

Ciudad nin Legazpi --- Nagrarani na an burokasan nin klase sa Septiembre 13, 2021 para sa masunod na school year 2021-2022 alagad naglalaom an Department of Education (DepEd) Bicol dawa igwa pang pandemya kayang abuton si dating enrolment sa target na 1.7 milyones na estudiantes.

Kabale na digdi puon sa kindergarten, elementarya, segundarya asin Alternative Learning System (ALS) asin an sinambit na numero nin estudiantes sa pribado asin pampublikong escuelahan.


Ini an mga pahayag ni DepEd Regional Director Gilbert Sadsad mantang an pagpalista kan mga estudiantes para sa seguridad kan estudiantes, magurang laban sa virus sa paagi nin online, Facebook chats, text messages asin drop box kan escuelahan alagad si yaon sa hararayong barangay na daing signal kan internet connection nagpipila sa mga barangay na iyo an may hababang numero kan mga nagpapalista.


Pig-osipon pa sa Bicol Mail ni Sadsad na sa saiyang ginibong paglibot sa mga remote public schools kan nakaaging Viernes, Agosto 27 sa Barangay Burabod Elementary School, Calabanga, Camarines Sur saro pa sanang estudiante an nagpa-enroll.


Alagad nagtutubod an direktor na pag-abot sa huring mga aldaw antes kan Septiembre 13 malangkaw an enrollees sa mga hararayong barangay.


Sa datus kan enrollees sa Bicol hasta kan Agosto 31 maabot na sa 600 mil asin piglalaoman sundo sa burokasan nin klase kayang abuton an target na enrollment sa pribado asin pampubliko.


Nagbaba an saindang enrollment kan enot na taon na maglakop an coronavirus disease (Covid-19).


Pigbuyagyag pa na sa target na enrollment sa sunod na school year dakul na an mga transferees hale sa pribadong escuelahan asin posibleng abuton ini sa viente por ciento.


Naiintindihan kan DepEd kun dakul an nagbabalyo sa escuelas publika mantang dakul an nawaran nin trabajo na dai na kayang makasustenir an gastos asin matricula kan mga magurang hule ta apektado kan pandemya.


Napag-araman kan Bicol Mail sa nagkaperang organisasyon kan Parent Teachers Association (PTA) na dejado sa pag-adal an mga estudiantes sa blended learning pabor sinda na ibuelta sa physical classes alagad an peligro naman an problema sa pandemya.


‘‘Lawgaw’’ an saindang pag-adal maging sa online classes an problema naman an internet connectivity ta dai man estable an signal, sabi pa.


Kan nakaaging semana piglansar na an Brigada Eskwela mantang pig-aandaman an burokasan nin klase. (dpa)


Camarines Sur National High School sa Ciudad nin Naga na inaabot nin dose mil an enrollees alagad dai pa maheheling an mahibog na estudiantes mantang prohibido pa an physical classes. (dpa)