SA SEPTIEMBRE 2022: Festividad ni Ina ibabalik na

Matapos kan duwang taon na mayong actividades an festividad ni Ina huli kan pandemya, an Archdiocese of Caceres sa Ciudad nin Naga nagaandam na kan pagbalik sa tradisyonal na Traslacion Procession saka Fluvial procession sa maabot na Septiembre 2022 oras na dagos-dagos nang hababa asin zero sa caso kan coronavirus disease sa ciudad.


An caceres nagpaluwas nang circular na nagtutugot na sa tradisyonal na ‘‘foot procession’’ kan mga santo ngunian na Semana Santa, Jueves asin Viernes Santo sa Abril 14-15 mantang nasa Alert level 1 an ciudad asin perang semana nang mayong na-ikurit na caso sa Covid-19.


Si Padre Louie Occiano, director kan Caceres Commission on Communication (CCOM) nagpahayag sa entrevista kan Bicol Mail na sainda nang pig-ponan an foot procession ngunian na maabot na semana santa alagad kun dagos-dagos nang mayong problema sa Covid-19 idadagos na an saindang mga actividades sa nagdadangadang na festividad ni Ina.

Santuario de Nuestra Senora de Peñafrancia sa Penafrancia Ave., Ciudad nin Naga piglalaoman na ribo-ribo naman na mga deboto ni Ina an masungko digdi sa panahon na ibalik na an actividades sa Peñafrancia fiesta. (dpaureus)


An simbahan magkakaigwa giraray nin urulay saka pinal na desisyon alagad sainda man hahalaton an desisyon kan local IATF.


Si plano kan caceres motorcade procession kan mga santo an gigibohon sa semana santa kun yaon pa an Covid-19 alagad huli kan marhay na resulta sa nagparababang caso asin zero case sa Ciudad nin Naga ibinalik an foot procession, sabi pa ni Occiano.


Sa pinakahuring datus nasyonal sa Covid-19 an Departamento de Salud nagpaluwas nin report na mantenido an padagos na paghuros kan caso sa virus.


Huli kaini, piglalaoman na ribo-ribo naman na mga Bicolanong asin dayuhan na mga deboto ni Ina an masungko sa maabot na festividad ni Ina sa Septiembre 2022.


Cada taonan na kafiestahan ni Ina inaabot nin labi sa on milyon na deboto maging turista an nabisita para sa Ina kan Bicolandia.


SA LGU NAGA


Si Consejal Sonny Rañola, Chairman kan Committee on Health sa Sanggunian Panlungsod nagsabi na kun dagos-dagos nang zero sa caso sa Covid -19 pakatapos kan Semana Santa asin naheheling kan local IATF na mayo nang problema sa paglangkaw kan virus pueding tugotan na an tradisyonal na mga actividades sa festividad ni Ina.


Saiya pang sinabi sa datus kan DOH national office padagos an pagbaba kan caso sa virus.


Naheheling kan consejal na marerealisar na an piglalangkag na pagbalik kan traslascion asin fluvial procession ki Ina.


An City Hall an mahimo man idagos an mga actividades kan ciudad siring kan civic asin military parade asin an beauty contest na Miss Bicolandia 2022. (DPAureus)