SA SUNOD-SUNOD NA PAGLINOG: Mga edificio sa Naga mayo sa peligro magrampahog – CEO
Mt. Isarog, Asog dai activo-Phivolcs
An City Engineer’s Office (CEO) kan lokal na gobierno sa Ciudad nin Naga nagpapadagos pa kan saindang inspeksyon sa mga edificio alagad saro sana an nagkaigwa nin destroso sa 25 nang mga propriedad kan gobierno, simbahan, escuelahan maging pribadong edificio na saindang nalibot.
Ini kasunod kan padagos na namamatean na ‘‘kumpol-kumpol na paglinog alagad dai man naglalangkaw an ‘‘Magnitude’’ o inaapod kan Philippine Institute of Volcanology and Seismology (Philvolcs) na earthquake swarm puon kan enot na linog na 4.3 Magnitude kan Oktubre 14 hasta kasoodma igwa nang labi 22 mga pagyugo-yugo sa Naga asin iba pang mga banwaan sa CamSur.
An duwang eskalon na Barangay Hall kan Mabulo iyo sana an may destroso na nagbabagsak na an porsyon kan sementadong atop na delicado magbagsak sa tungod na opisina kan Punong Barangay.
Sinabi ni Assistant City asin jefe kan Building Official kan CEO, Engr. Elmer Albo sainda nang pina-abisohan an opisyales de barangay na mag-evacuar na sa lugar asin maggamit nin temporaryong opisina.
Kabale sa mga na-inspeksyon na kan CEO iyo an mga minasunod, Peñafrancia Basilica Minore, Naga Metropolitan Cathedral, Peñafrancia Church, Bishop Palace, Naga City People’s Mall, JMR Coliseum, Metro Naga Sports Complex, Mabolo Barangay Hall, Land Bank sa centro kan ciudad, Land Bank sa Rotunda, Sabang Elementary School, Sabang High School, Santa Cruz Elementary School, Naga Central School 1 and 2, Carolina High School, Tabuco Elementary School, Camarines Sur National High School sa Peñafrancia asin Liboton, SM City, LTFRB Building asin Hall of Justice.
Sinabi pa ni Albo an ma-inspeksyon kan mga tulay asin ibang escuelahan iyo an Camarines Sur 3rd Engineer District kan DPWH sa Baras, Canaman, Camarines Sur.
An CEO sa pamamayo ni Acting City Engr. Alexander Caning papadarahan man nin surat an mga pribadong kagsadiri nin mga darakulang edificio na magconsulta sa mga civil asin structural engineer na ipa-inspeksyon an saindang mga estraktura nganing maseguro an kapusogan.
Kabale sa dapat ma-evaluar iyo an 2 storey, nag-eedad na nin sampolong taon asin lampas pa.
Ano man na obserbasyon sa mga edificio dapat isumiter sa CEO kan City Hall.
MT. ISAROG, MT. ASOG PIGSEGURO NA BAKONG ACTIVO, sabi
Si Dr. Paul Alanis kan Philvolcs Bicol nagpahayag na dapat dai mahadit an mga taga Camarines Sur huli kan sunod-sunod na mga paglinog asin an epicenter yaon sa Canaman, Camarines Sur delicado an Mt. Isarog asin an Mt. Asog sa Ciudad nin Iriga. Tectonic origin an mga nangyayaring paglinog puon kan Oktubre 14.
Ini an piglinaw ni Alanis sa virtual zoom meeting sa mga miembros kan Sangguniang Panlungsod kan ciudad sa tahaw kan paghadit sa ciudad mala ngani pigdeclara na kan City Hall an heighten alert.
Dai nahehelingan na nagiging activo asin ‘‘abnormality’’, an Mt. Isarog asin an Mt. Asog, sabi pa kan Philvolcs.
Sinabi man ni Dr. Ismael Narag, Chief Seismology kan Philvolcs Bicol an earthquake swarm bako nin tanda igwa pang masunod na mga makusog na paglinog. Ini ‘‘kumpol-kumpol’’ sana asin dai malangkaw an magnitude.
Kan taon 1907 nagkaigwa nin makusog na paglinog sa Camarines Sur na 7.4 magnitude asin matapos an ika-114 taon nagkaigwa nin 4.3 magnitude kan Oktubre 14, sabi pa. (DPAureus)