SA TRAPAL NIN CANDIDATO NA NAKAKABIT SA PUVs: Dai binabawal-Comelec

Dai dapat pakiaraman kan arin man na LGUs asin awtoridad an nakakabit na tarpaulin o election campaign materials sa public utility vehicles (PUVs) maging sa transport terminal huli ta mabalga ini sa saindang deretso asin ‘‘freedom of expression’’.

JULIA

Ini an piglinaw ni Abogado Maico Julia Jr., election officer sa Ciudad nin Naga sa tahaw kan nagluwas na video sa social media na pigcucuestion an kasugoan kan City Hall kan sarong miembro kan Public Safety Office na bakong tama an orden kan ciudad na taranggalon ninda an mga tarpaulin kan asperanteng congresista Nonoy Magtuto sa tercer distrito kan Camarines Sur na nakatakod sa mga pampasajerong tricycle.

Nagpaliwanag man an PSO sa media sa pamamayo ni Renne Gumba na hinapot niya an suspek sa social media video na may tahob an lalawgon na nagtataram contra sa City Hall alagad nagpapahimotik.

Piglinaw kan PSO Chief na mayo sindang orden sa miembros kan saindang opisina na taranggalon an tarpaulin nin asperanteng candidato sa tricycle.

Maging si Alcalde Nelson Legacion nagpaluwas kan saiyang lado na mayo siyang kasugoan sa PSO na taranggalon an tarpaulin. ‘‘Kun iguang kasogoan kaidto pa, haloy na baga nakatakod sa mga tricycle an mga tarpaulin’’.

Sa entrevista kan Bicol Mail ki Julia sinabi kaini na malinaw sa naging desisyon kan Corte Suprema sa caso kan United Transport Koalisyon vs Comelec na binaba kan Abril 14, 2015 na nagsasabi ‘‘The Supreme Court declares the prohibition on posting election campaign materials on public utility vehicles and transport terminals as unconstitutional, recognizing the infringement on the fundamental right to freedom of speech and the importance of political expression in the democratic process.’’

An Commission on Election nagpaluwas nin resolusyon kan Enero 15, 2013, nganing iimplementar an RA No. 9006, na midbid sa ‘‘Fair Election Act’’, para sa eleksyon kan Mayo 13, 2013, nasyonal asin lokal.

Alagad an petitioner pigcuestion an resolusyon kan Comelec sa SC huli ta mabalga sa saindang ‘‘free speech of the private owners of PUVs and transport terminal’’

An Comelec nagsangat pa nin motion for reconsideration alagad binasura man sana kan SC.

An mga paglinaw na ini kan Comelec Naga huli ta nagrarani na an panahon nin pirilian sa masunod na taon.