SABI KAN CASURECO II: Records kan ERC sa contrata sa power suppliers, paribong
Sa atubang kan pagparalangkaw kan tarifa sa kuryente alagad an Energy Regulatory Commission (ERC) asin Camarines Sur II Electric Cooperative (Casureco II) Inc. nagkakaigwa nin kumplekto sa saindang mga records sa contrata sa power suppliers na halangkawon na an presyo kan saindang pinapabakal na generation cost sa mga cooperativa nin electricidad.
Sa pinaapod na diyalogo ni dating Bise Presidente Leni Robredo sa ika-duwang aldaw na ERC Dialogue with the Casureco II Power Rate kan Marso 23, 2023 nagpahayag an ERC sa paagi kan saindang Chairman Monaliza Demalanta na an contrata kan Casureco II sa Masinloc nag-expire na kan 2015 mantang sa San Miguel Energy (SMEC) nagpaso na kan 2015.
Sinabi pa kan ERC na malinaw na nag-iimplementar an Casureco II na nagpaso na an contrata o mayong aprubal hali sa saindang ahencia. Huli kaini, an cooperativa dapat mag-adjust kan pass-on charges sa masunod na billing sa miembros consumedores.
Sa lado kan Casureco II, si contrata ninda sa power supplier na Masinloc para sa 19 megawatts (MW) matapos sa 2026 mantang sa San Miguel Energy Corporation (SMEC) para sa 10 MW matapos sa 2024.
Sinabi pa sa ERC report si contrata sa power suppliers parejong nagtapos na si provisional authority alagad nagkabirigla an mga opisyales kan cooperativa sa pamamayo ni General Manager Emelita Candia.
Sa entrevista kan Bicol Mail ki Rinner Bucay, opisyal na parataram kan cooperativa, saindang pinapahimotikan an ERC report sa ginibong diyalogo na nag-expire na an mga contrata sa suppliers.
Sinabi pa ni Bucay na igwa sindang pigsusumiter sa ERC nin mga monthly asin yearly documents kan power rate kun iyan over o under recovery. Afuera pa kaini, may mga ‘‘queries’’ pa sinda alagad mayong aksyon an sinambit na ahencia. Huli kaini, mantenido ninda na padagos an contrata sa duwang power suppliers.
Masunod sana sinda sa adjustment kan tarifa kun igwang orden an ERC, sabi pa kan Casureco II.
Nakatalaan cuestionon kan cooperativa an ERC report mantang pig-aandam ninda an mga documentos sa mga contrata sa power suppliers nganing isumiter sa ERC sa Manila.
Dapat nakahanap nin ibang power supplier an Casureco II na hababa an tarifa sa generation costs siring kan piglaogan sa PSALM alagad pendiente pa sa legal department.
An huring aldaw kan diyalogo na inatendiran kan mga opisyales kan cooperativa sa pamamayo ni GM Candia, Congresista Gabby Bordado kan tercer distrito kan Camarines Sur, Alcalde Nelson Legacion, mga representante kan LGUs asin iba pang stakeholders.
Sinabi ninda Bordado asin Legacion an sinambit na diyalogo saro na sa makakatabang nganing mahanapan nin solusyon an pagtapyas kan tarifa sa kuryente kan cooperativa.
An Casureco II saro sa may halangkaw na tarifa sa kuryente alagad saindang pigdadahilan an pagparalangkaw sa presyo kan generation costs kan saindang power suppliers alagad ipinasa man ninda sa miembros-consumedores na igwang pagtugot an ERC.
An mga negosyante sa Ciudad nin Naga asin miembros-consumedores kan cooperativa nagrereclamo na sa halangkawon na tarifa sa kuryente.
Mientras tanto, an Naga City People’s Council, consumer groups asin stakeholders nanindugan na dapat adalan asin magkaigwa liwat nin negosyasyon sa contrata sa mga suppliers asin igilid ngona an power rate increase sagcod na mayo pang aksyon. (DPAureus)