SABI KAN CONSEJAL SA SP: Mandatory vaccination pagbalga sa HR

Malinaw na pagbalga sa ‘‘human rights’’ dai puedeng fuersahon kan lokal na gobierno kan Ciudad nin Naga an mga empleados na nagsasayumang magpatudok nin bakuna laban sa coronavirus disease.

Si Consejal Salvador Del Castillo, sarong abogado asin certified public accountant nagpahayag kan saiyang panindugan kan maging bisita sa sesyon regular kan Sangguniang Panlungsod kan Martes, Deciembre 7 si City Health Officer asin pamayo kan Health Emergency Task Force (HERFT) Dr. Vito ‘‘Butch’’ Borja na nagpahayag na dapat magpatudok bakuna an gabos na empleados kan City Hall mantang ini pigmamando kan IATF.


Alagad si habo obligado cada ika-duwang semana magsumiter kan saindang negative antigen test asin an gastos sa sadiring bulsa kan empleados. Si dai puede huli sa problema sa salud dapat magpresentar kan saindang medical certificate hale sa doctor.


An bagay na ini iyo man si pig-anunciar ni Alcalde Nelson Legacion sa ginibong flag raising ceremony kan Lunes, Deciembre 6, 2021 base sa kasugoan kan national IATF.


Sinabi pa ni Del Castillo maging an national IATF dai puedeng mag-imponer na mandatory an pagpabakuna nin vaccines contra sa Covid- 19. ‘‘personal choice yan kan empleado’’


An nagkaperang mga empleados kan City Hall na habo nang magpasambit kan saindang pangaran nagpahayag na saindang pig-oomaw an panindugan ni Consejal Del Castillo na nakaka-intiende kan human rights.


Sa Department of Education sa Ciudad nin Naga, si City School Superintendent Manny De Guzman nagpahayag na saiyang ginilid muna an pinaluwas niyang memorandum na mandatory na sa gabos na mga paratukdo na magpabakuna nin vaccine contra sa Covid-19.


Alagad iginilid an memorandum sa atubangan kan mga pagcontra kan mga paratukdo na nagrereclamo na pagbalga sa deretso humano kun pipiriton sinda magpabakuna.


Kinumfirmar kan pamayo kan DepEd Naga na dakul mga paratukdo an nagsurat sa saiya na nagcucuestion kan memorandum.


Sinabi ni De Guzman nagpaluwas siyang memorandum sa mandatory vaccination komo pagsunod sa mandato kan national IATF.


Envez kaini, hahalaton nalang ni De Guzman an ano man na ipapaluwas na memorandum kan saindang opisina sentral sa isyu sa ‘‘mandatory vaccination’’.


Saiya man giraray pig-eenganyar si mga ‘‘undecided’’ na magpabakuna para sa proteksyon kan saindang salud laban sa deadly virus. (dpa)