SABI KAN DOH BICOL: CamSur mantinido an halangkaw na caso nin rabies

Mantinido kan Camarines Sur an may pinakalangkaw nin caso kan rabies sa Rehiyon Bicol sa laog nin anom na taon.

Ini an kumfirmasyon kan DOH Bicol CHD sa pinaapod na press conference kan Juevez, Hulyo 3, 2025 na ginibo sa Ciudad nin Naga. Si Dr. Xavier Vallejo Medical Officer asin Regional Manager, National Rabies Prevention and Control Program mantang an Camarines Sur igua na nin 8,525 poon kan taon 2020 hasta 2025 ini sa 24,914 total na caso sa rehiyon.

Ini apesar kan igua nang ordinansa an Capitollo Provincial contra sa mga butas asin layas na ataman na ayam. Bako lang an provincia envez an gabos na LGUs sagcod sa barangay iguang ordinansa sa pagbawal kan pagbutas nin ayam nganing maibitaran an mga caso nin rabies.

An problema igua nin ordinansa alagad kulang sa estrictong implementasyon.

Base sa report pa kan DOH an nagsunod sa Camarines Sur iyo an Camarines Norte 5,105; Sorsogon 4,970; Masbate 2,812; Catanduanes 2,203 alagad sa pinakahuring data zero na sa casong rabies; asin Albay 1,299.

Nagpatanid man si Dr. Vallejo na dapat pabakunahan an ataman na ayam asin ikos.

Dapat maging responsable an mga nag-aataman kan sinambit na mga hayop nganing dai makadisgracia mantang an saindang target na dapat zero na sa caso an Rehiyon Bicol sa 2027. Saiya pang sinabi na iguang nang tolong suspek sa human rabies sa rehiyon ngunian na taon.

Base sa Acta Republica 9482 o an ‘‘Anti-Rabies Act of 2007’’ mandato sa ley na dapat iparehistro asin pabakunahan sa LGU kan nag-aataman kan hayop. Siisay man an masinutil mamulta nin P2,000 sagcod sa P25,000.

Alagad si naprubaran na nagkuryente kan hayop sagcod nagadan pwedeng masentenciahan nin saro hasta sa apat na taon.