SABI KAN LTO: Mga pasaway na tsuper dai kabale sa 10 yr validity

An Land Transportation Office (LTO) nag-aako sana kan mga aplicante para sa ten year validity na makua asin ma-renew kan saindang licensiya sa pagmanijo na limitado sana sa mayong traffic violations alagad igwa pa giraray nagpoprubar na makalusot.

Sa aroaldaw na maproceso kan saindang licensiya igwang nag-iinsister alagad dai tinutugotan kan LTO District Office sa Ciudad nin Naga.

Si Eric Torrecampo, opisyal na parataram kan LTO Naga nagpahayag na si mga may traffic violations puon kan 2016 hasta 2021 dai kabale sa ma-iisyuhan kan ten year validity sa driver’s license asin dai na dapat sinda mag-iinsister huli ta prohibido sa saindang guidelines.

Dakulang bagay sa mga tsuper an tinaong opurtunidad sa sainda nganing pag-arogan man kan iba para maglikay sa pagmanijo asin magsunod sa gabos na reglamento sa trafico, sabi pa kan LTO District Office.

Nagpuon an bagong procesong ini ngunian na Deciembre na inaabot nin sangatos an aplicante aroaldaw alagad nag-aabot sana sa 60 aroaldaw sa paghinapos kan taon.

Mientrastanto, ngunian na Deciembre 2021 na dakul an nagpupuroli sa Camarines Sur hale sa National Capital Region maging sa iba pang provincia regular an ginigibong inspeksyon kan law enforcer kan ahencia sa mga bus asin jeepney terminal nganing maseguro na safety an viaje nin mga pasajeros.

Nagbugtak pa sinda nin motorized assistance sa national highway para magtabang kun nagkakaigwang aberiya an viajero kan pribado maging pampasajerong vehiculo. (dpa)