SABI NI GM LAUNSING: Hababang tarifa binabasol sa pagkalugi kan MNWD
Nag-atubang sa open forum si suspendidong MNWD General Manager Virgilio Launsing na pinaapod kan junta directiva na ginibo sa Multi-Purpose Hall kan Metropolitan Naga Water district kan Martes, Marso 15 alagad an saiyang pigbabasol kun nalugi an manijamiento kan water district sa laog na nin tolong taon iyo an na-pendienteng implementasyon kan pagpalangkaw sa singil sa tubig kan 2019 asin inaapod na none revenue water.
Alagad an ano man na plano sa water rate increase dai nakakua nin suporta envez pigcontra ninda dating BOD Chairman Tato Mendoza, Director Engr. Emeterio Aman asin Alcalde Nelson Legacion.
Pighalimbawa kan GM kun nagsusueldong P10,000 alagad an problema an ginagastos inaabot na nin Php15,000.
Nag-atendir sa open forum si Launsing na nagtapos na an pitong aldaw na preventive suspension kan junta sa general manager alagad pinalawig hasta sa Viernes, Marso 18.
An punto kan suspendidong GM bilang kasimbagan sa mga pigbiklad na documento asin kumparasyon ni Division Manager Boboy Felix na sa record sa personnel services puon kan taon 2015 hasta 2018 sa fondo para sa personnel services mayo pang problema alagad kan 2019 na nag-aabot sa Php155 na may piglangkaw nin Php15.9 milyon kumpara kan 2018. Alagad mawot malinawan kan division manager kun saen nagdalagan si cuartang Php15.9 milyon
Dai man nasimbagan kan GM envez pigbabasol an dai naimplementar na water rate increase, nag-iitok sana sa none revenue water asin dakulang gastos sa dugang na sueldo.
Saiya pang pigbuyagyag na dapat dai nalulugi an manijamiento mantang base sa record sa MNWD Cash in Bank kan taon 2015 igwang Php198-M; kan 2016 – Php197M; 2017 – Php199M; 2018 – Php201.9M alagad kan 2019 – Php185.1M nagbaba nin P101M an hapot sain ginamit asin sain ginastos?
An saro sa naheheling na ginastosan iyo an mga binakal na daga sa barangay Mabulo na cantidad Php23-M asin sa barangay Balatas na cantidad Php53 na dai man napapakinabangan sa rason kan manijamiento na mayong fondo sa proyekto.
Si Board Chairman Gilbert Nero nagpahayag man na an solusyon sa pagkalugi magtipid, bawasan an personnel services na 48 por ciento kan fondo kan water district nadalagan sa sueldo. Kun mangyari ini pigkakarkulong Php8M hasta Php12M an magiging savings.
Si dating BOD Chairman Mendoza kan panahon ninda parating pig-uurulayan an water rate increase alagad dai sinda nag-uuyon sa dahilan na an saindang mga savings pigdidikit-dikit nindang gamiton si cuarta asin an taon-taon na dugang na consumedores makakatabang sa revenue.
Saiyang pighalimbawa envez na vehiculo an saindang babakalon na service alagad tricycle para sa service kan empleados asin maging pagpa-dakula kan saindang opisina dai sinda nag-uutang envez si fondo hale sa savings.
Nagtutubod man si dating BOD Emeterio Aman, dai kaipuhan an pagpalangkaw kan singil sa tarifa sa tubig mantang taon-taon nagdadagdag an saindang consumedores.
‘‘Dagdag na consumedores dagdag man na revenue’’ mala ngani si dating 30 mil nagsakat na sa 50 mil an consumedores, sabi pa.
An open forum inatendiran kan mga empleados kan MNWD, mga dating director kan water district, mga alcalde kan Camaligan, Gainza, Magarao, Canaman asin Ciudad nin Naga alagad an presente sana sinda Alcalde Legacion, Alcalde Agor kan Gainza asin representante kan LGU Magarao. (dpa)