top of page

SABI SA SURVEY: Mga tios sa Naga mas dakul pakalihis kan limang taon

SARONG research paper an pigpaluwas kan Ateneo Social Science Research Center na nagpapaheling na mas dakol na mga residentes/botantes sa syudad nin Naga an pigkokonsiderar an saindang mga sadiri komo mga tios – mayong pinagbago sa nakalihis na limang taon.


An nasambit na papel susug sa pagsigato kan nasambit na research center sa mga respondents sa syudad, pigkakarkulong nasa 1,280 na mga taga Naga, kompwesto nin 35 residentes kan Barangay Abella, 15 sa Bagumbayan Norte, 45 sa Bagumbayan Sur, 70 sa Balatas, Calauag – 65, Cararayan – 120, Carolina – 45, Concepcion Grande – 65, Concepcion Pequeña – 136, Dayangdang – 30, Del Rosario – 60, Dinaga – 5, Igualdad – 19, Lerma – 10, Liboton – 20, Mabolo – 55, Pacol – 85, Panicuason – 16, Peñafrancia – 35, Sabang – 45, San Felipe – 130, San Francisco – 10, San Isidro – 25, Sta Cruz – 45, Tabuco – 25, Tinago – 15 asin Triangulo – 55.


Sa pahina 8 kan research paper may titulong “2024 Naga City Poverty and Governance Public Opinion Poll”, nagluluwas na 471 na mga taga Naga an pigkokonsiderar an saindang mga sadiri komo pobre, 389 sa mga ini konsiderado na nasa katamtaman sanang klase nin pagbuhay mantang 420 na Nagueño an pigmimidbid an sadiri komo may kaya.


Sa nasambit na pahina maheheling man an mga taga syudad na nagkumpara kan saindang buhay pakalihis nin limang taon. 481 digdi mga gainers o nagsasabing mas marhay an buhay sa presente.


Pigkarkulong 507 mga residentes an nagsasabing dati lang, mayong pinagbago an buhay mantang 289, pigheheling an sadiri komo losers – mga nagsasabing nagin malala an sitwasyon.


Tolo sa mga taga Naga an mayo nin idea kun anu man naggad an nagin buhay sa laog nin limang taon asin 192 an net gainers.


Pig-aram man kan unibersidad an pagheling kan mga respondents sa kalidad kan saindang buhay sa masunod na tolong taon. 742 sa mga ini an naglalaom na magigin mas marhay an saindang buhay, 323 mga nagsasabing parehas sana – mayo nin magigin pagbabago mantang 60 an nagsasabing mas malala an saindang mga sitwasyon.


Mayo nin idea an 154 na mga Nagueño manungod sa mangyayari sa saindang mga buhay, sarong persona an nagsayumang magsimbag asin 682 an konsideradong net personal optimism. (Paulo DS. Papa)

Comments


bottom of page