Sadit na LGUs tikapo sa fondo pambakal bakuna

Naghahalat sana an 3rd hasta 5th class municipalities kan suplay nin bakuna mantang tikapo sinda nganing mag-order nin sadiring suplay sa pharmaceutical company.


Igwa man alokasyon para sana sa programa laban sa Covid-19 kabale na digdi para sa quarantine facility.


An saindang suplay hale sa Department of Health (DOH) alagad maagi sa Capitolio Provincial nganing sinda na an mag-distribuer sa mga lokal na gobierno mantang an LGUs iyo na an bahala sa pagtudok nin bakuna sa saindang residentes.


Maabot sana sa 1,200 hasta 2,000 nin vaccines an saindang narerecibe na tolos man tinutudok sa mga residentes depende sa categorization kan DOH.


An LGU kan Pamplona, Camarines Sur pinahayag ni Alcalde Ronald ‘‘Boy’’ Franco sinda nasa 4th class municipality asin mayong kakayahan an saindang annual budget nganing maka-order nin bakuna. Sa LGU Lupi na sarong 3rd class, naghahalat sana sinda kan suplay. Sa LGU Bombon, sinabi ni Consejal Jeffrey Pasobillo na dai kabale sa saindang alokasyon ngunian annual budget an pagbakal nin sadiring vaccines huli ta yaon na sa gobierno nasyonal an bilyones pesos na fondo asin sa LGU San Jose na sarong 5th class, sinabi ni Consejal Audie Concina na mas lalo na an saindang LGU mientras na igwa sanang annual budget na nag-aabot sa P90 milyon.


An mga 2nd asin 1st class municipality igwang kakayahan na mag-order nin sadiring vaccines nganing dai magparahalat kan abalang pag-abot kan suplay hale sa DOH.


Igwa naman na bagong mag-abot nin suplay kan Astra-Zeneca sa DOH Bicol asin igwa nang tagama nin 3,900 doses para sa Camarines Sur.


Sa Ciudad nin Naga, na sarong bilyonaryong ciudad nag-order na nin 50 mil doses nin Covaxin sa pharmaceutical company na gibo sa Bharat, India alagad pendiente pa an saindang dokumentos sa multi-party agreement alagad abalahon pirmahan ninda DOH Secretary Francisco Duque III asin Vaccines Czar Carlito Valdez Jr.


Igwa nang P63 milyon na alokasyon an City Hall nganing dai mag-asa sa gobierno nasyonal an problema an dokumentos hale sa duwang ahencia nasyonal. (dpa)