''SAGIP SAKA ACT'': LGUs pwedeng magtungod kan paroy nin mga paraoma

Napapanahon nang maghiro an mga LGUs nganing matabangan an sektor nin paraoma na perming nalulugi huli sa pagparababa kan presyo nin paroy sa paagi kan pag-implementar kan ‘‘Sagip Saka Act’’ na saindang pwedeng bakalon an paroy sa presyong P20 cada kilo kumpara sa hababaon na presyo nin paroy sa mga kumprada na nagcacantidad na sanang P8, P10, hasta P12.

‘‘An Sagip Saka Act’’, pwedeng dai maggamit nin fondo an LGU envez tinutugotan na mag-utang sa bangko nganing gamiton na kapital sa pagtungod nin paroy kaparejo kan ginigibong operasyon kan National Food Authority.

An ley, padreno si Senador Kiko Pangilinan asin inaprubaran ni Presidente Rodrigo Duterte kan April 17, 2019 na ‘‘An Act Instituting the Farmers and Fisherfolk Enterprise Development Program of the Department of Agriculture’’

Si dating Consejal Julian Lavadia Jr. asin program host ngunian sa OK FM kan Asenso Agricultura Asenso Paraoma, nagsabi na padagos an agrangay ngunian kan pobreng paraoma huli ta permi nalang nalulugi kun panahon nin aranihan mantang iguang mga opurtunistang kumprador na binabagsak an bakal ninda sa presyong P10 cada kilo kan paroy babawasan pa nin sarong kilo cada sako.

Si Lavadia dating Consejal sa Ciudad nin Naga asin dating Consultant sa City Agriculture Office, nagsabi pa na dakul na siyang nakaulay na mga paraoma sa ciudad na dapat mag-aksyon na an City Hall sa paagi kan Sangguniang Panlungsod.

An Naga igua pang 700 hektaryang omahan kadakle sa upper barangay. Kun gibohon ini kan City Hall dakulang bagay sa paraoma huli ta an ‘‘asenso sa agricultura, asenso kan paraoma’’ makakatabang pa sa halangkaw na produksyon nin paroy, sabi pa ni Lavadia.

Maging an ibang LGUs pwedeng mag-implementar kan sinambit na ley siring digdi sa Camarines Sur na iyo an tambobong nin paroy sa Kabikolan.

An ibang LGUs arog kan Capitolio Provincial sa Camarines Norte an suporta sa paraoma sa paagi nin pagtagama nin fondo na an cada kilo kan paroy na pinapatungod ninda sa NFA natao nin dugang na P5 sa presyo kan NFA na P17 hasta P23. Pighalimbawa digdi kun sa P23 iguang dagdag na P5 magiging P28 cada kilo. Ginibo man ini sa ibang LGUs sa Sorsogon asin Albay.

Bulan naman nin aranihan nin paroy alagad nagrereclamo an mga paraoma sa bagsak na presyo kan produkto huli sa ibang mga opurtunistang kumprada. (Bicol Mail)