Sagnay-Tiwi road sarado sa mga vehiculo

SagÑay, Camarines Sur --- Pinasarahan kan lokal na gobierno an sarong agihan kan Sagñay-Tiwi road huli kan padagos na pagrasay kan daga sa tahaw kan tinampo na apektado an dalagan kan mga vehiculo.

Si Alcalde Jovie Fuentebella nagpaluwas nin direktiva sa 4th Engineering District kan Department of Public Works and Highways (DPWH) asin Municipal Risk Reduction Management Office para sa temporaryong pagsara sa sarong agihan nin vehiculo na viajeng Camarines Sur pasiring sa Albay, vice versa.

An Sagnay-Tiwi road iyo nagpalipot kan viaje kan bus maging pribadong vehiculo hale sa Partido district pasiring sa provincia nin Albay.

An aksyon kan jefe ejecutivo nganing makalikay sa ano man na aksidente sa trafico alagad temporaryo sana.

An Engineering District kan obras publica padagos na kan saindang clearing operation.

An pagrasay kan daga walat pa kan mga nakaaging bagyong Quinta, Rolly asin Ulysses mantang igwa pang mga nangyayaring pagbulos nin uran ngonian na bulan nin Deciembre.

Ngonian na semana an PAGASA asin an National Disaster Risk Reduction Management Council (NDRRMC) nagpaluwas nin aviso sa publico huli kan padagos na mga pagbulos nin uran delicado an mga pagrasay nin daga.

Nagpahayapit sa nagkaperang porsyon kan tinampo sa Sagñay-Tiwi road an nagrasay na mga daga asin mga gapo sagcod na nagdesisyon an LGU na sarahan sa one lane sa trafico. (VM Harold San Felipe FB)