Sakay ki Ina piggibo sa irrigation canal kan NIA
- Bicolmail Web Admin
- Sep 22
- 2 min read
Ni Sonny Malate
Goa, Camarines Sur --- Bilang pagrukyaw sa kafiestahan kan Patrona kan Kabikolan, Nstra. Sra. Virgen de Peñafrancia, an mga devoto kaini sa manlaenlaen na lugar an iguang man-iba-ibang paagi kan pagpahayag kan saindang hararom na debosyon ki Ina.
Sa Partido Area, an pagsakay ki Ina ginigibo sa salog (fluvial), dagat (maritime) o kumbinasyon kaini arog kan sa Sabang, San Jose Partido. Saro o duwang semanang enot na ginigibo an celebrasyon digdi kesa sa Peñafrancia Festival sa Naga, an centro kan debosyon ki Maria sa Bicol.
Sa banwaan kan Goa, an Parroquia ni St. Francis Xavier na an simbahan nasa barangay Halawigogon, sa pamamayo ni Rev. Fr. Armand M. Ortinero, pambihira na an sakay ki Ina ginigibo sa irrigation canal sa mga barangay kan Halawigogon, Taytay, asin Napawon, tolo sa anom na mga barangay na nasasakopan kan Parroquia.
Ngonian na taon, an sakay naging memorable mantang an naging mayor na celebrante sa Banal na Misa na ginibo sa Covered Court kan Goa National High School (GNHS) sa barangay Taytay iyo mismo si Most Rev. Rex Andrew Clement Alarcon, DD.
Segun ki Barangay Capt. Sonny Prades kan Barangay Taytay, naging sibot an mga magkataraid na barangay sa paglinig kan irrigation canal, pagkabit nin mga banderetas saka iba pang mga preparasyon para sa dakulang actividad.
Apwera sa barangay Council kan Taytay asin lima pang mga barangay na sakop kan Parroquia, nakatuwang pa man kan Simbahan iyo an Parish Pastoral Council sa pamamayo ni Nemia Rodriguez, mga religious organization, GNHS sa liderato ni Crespin Adayo Jr. asin mga residentes.
Sa pahayag ni Prades, an macolor asin maogmang procession sa saindang Parroquia pinoonan anom nang taon an nakaagi kan si Rev. Fr. Joe - Nelo P. Penino an cura parroco.
Naobservaran kan oficial na apwera kan mainstream media, an social media, orug na an mga vlogger, nakatao nin mahiwas na publicidad tanganing makahatak nin rinibong mga devoto asin bisita gikan sa pagtaraid na lugar.
Dakula an pasasalamat ni Prades na huli sa local na sakay ki Ina sa saindang Parroquia, orug pang nagrararom an debosyon kan mga residentes sa Patrona kan Bicol bilang parasurog, pailihan asin kusog sa atubang kan mga katibaadan sa buhay.
An irrigation canal na piggigibohan kan sakay ki Ina sakop kan NIA- Cagaycay River Irrigation System (NIA-CRIS) na nagseserbi sa mga parauma sa nagkakapirang banwaan sa Partido.
An canal na ruta kan sakay may buka na cuatro metros asin may distanciang labing cuatro kilometros. Cementado an tig-ibong na gilid kaini asin an tubig na parating pahabayan o padaghan kan mga voyadores asin mga devoto na nag-aantabay sa pagsakay.
An andas ni Ina asin Divino Rostro nakalatag sa magkasuhay na balsang gibo sa kawayan. Ini iguang mga macolor na adorno. Sa kalabaan kan gilid kan canal yaon man an puti asin amarilyong mga banderetas.
Mientras na minaluway o minsan minarikas an paghiro ni Ina asin Divino Rostro sa kalabaan kan canal, kasabay man an makusog na musica, pagpamibi, pagrukyaw asin kurahaw kan mahibog na katawohan: VIVA LA VIRGEN! VIVA EL DIVINO ROSTRO!
Comments